റിലീസിന് മുൻപേ ബാഹുബലി 2 ന്റെ റെക്കോർഡ് തകർത്തു 2.0..!

ഇന്ത്യൻ സിനിമയിലെ ഏറ്റവും മുതൽ മുടക്കുള്ള ചിത്രം എന്ന ഖ്യാതിയുമായി എത്തുന്ന 2.0 ഈ വരുന്ന നവംബർ 29 നു ലോകമെമ്പാടും റിലീസ് ചെയ്യുകയാണ്. ഷങ്കർ സംവിധാനം ചെയ്ത ഈ ബ്രഹ്മാണ്ഡ ത്രീഡി ചിത്രത്തിൽ സൂപ്പർസ്റ്റാർ രജനികാന്ത്, ബോളിവുഡ് സൂപ്പർതാരം അക്ഷയ് കുമാർ എന്നിവരാണ് പ്രധാന വേഷങ്ങൾ ചെയ്യുന്നത്. ഇപ്പോൾ വരുന്ന റിപ്പോർട്ടുകൾ അനുസരിച്ചു റിലീസിന് മുൻപേ തന്നെ ഈ ചിത്രം SS രാജമൗലി ഒരുക്കിയ ബാഹുബലി 2 സ്ഥാപിച്ച ചില റെക്കോർഡുകൾ തകർത്തു കഴിഞ്ഞു. റിലീസിന് മുൻപേ തന്നെ അഡ്വാൻസ് ബുക്കിങ്ങിലൂടെ ഈ ചിത്രം നേടിയെടുത്ത കളക്ഷൻ 120 കോടി രൂപയാണ്. റിലീസിന് മുൻപേ തന്നെ 100 കോടി ക്ലബ്ബിൽ ഇടം നേടുന്ന ആദ്യ തമിഴ് ചിത്രം ആയി തലൈവരുടെ 2.0 മാറി കഴിഞ്ഞു.

ഏകദേശം 600 കോടിയോളം ആണ് ഈ ചിത്രത്തിന്റെ ബജറ്റ് എന്നാണ് ലഭിക്കുന്ന വിവരങ്ങൾ പറയുന്നത്. ലൈക്ക പ്രൊഡക്ഷൻസ് നിർമ്മിച്ച ഈ ചിത്രത്തിൽ അമി ജാക്സൺ ആണ് നായികാ വേഷത്തിൽ എത്തുന്നത്. എ ആർ റഹ്മാൻ സംഗീതം ഒരുക്കിയ ചിത്രത്തിന്റെ സൗണ്ട് ഡിസൈൻ ചെയ്തിരിക്കുന്നത് റസൂൽ പൂക്കുട്ടി ആണ്. നീരവ് ഷാ ദൃശ്യങ്ങൾ ഒരുക്കിയ ഈ ചിത്രം ഐമാക്സ് ത്രീഡി ടെക്‌നോളജി ഉപയോഗിച്ച് ഷൂട്ട് ചെയ്യുന്ന ആദ്യ ഇന്ത്യൻ ചിത്രം ആണ്. ഇതിന്റെ ടീസർ, ട്രൈലെർ എന്നിവ വമ്പൻ ജനശ്രദ്ധ നേടിയെടുത്തിരുന്നു. ടോമിച്ചൻ മുളകുപാടം ആണ് ഈ ചിത്രം കേരളത്തിൽ വിതരണം ചെയ്യുക. ഏകദേശം പതിനഞ്ചു കോടി രൂപയ്ക്കാണ് അദ്ദേഹം ഈ ചിത്രം ഇവിടെ വിതരണത്തിന് എടുത്തത്.