മണി ഹെയ്സ്റ്റിലെ പ്രൊഫസറിനെ മറന്നേക്കുക, ജോർജുകുട്ടിയാണ് ജീനിയസ്; ദൃശ്യം 2 നു പ്രശംസയുമായി പ്രശസ്ത ആഫ്രിക്കൻ ബ്ലോഗർ..!

മലയാള സിനിമയിലെ ഈ വർഷത്തെ മഹാവിജയമായ മോഹൻലാൽ ചിത്രം ദൃശ്യം 2 നേടുന്ന പ്രശംസാ പ്രവാഹം തുടരുകയാണ്. ദേശീയ തലത്തിലും ആഗോള തലത്തിലും ഇത്രയധികം പ്രേക്ഷക- നിരൂപക പ്രശംസ നേടിയ മറ്റൊരു മലയാള ചിത്രം അടുത്തകാലത്തെങ്ങും ഉണ്ടായിട്ടില്ല. ജീത്തു ജോസഫ് രചിച്ചു സംവിധാനം ചെയ്ത ഈ ചിത്രം നേടിയ മഹാവിജയത്തോടെ മോഹൻലാൽ എന്ന നടനും താരത്തിനും ലഭിച്ച ആഗോള ജനപ്രീതിയും താര മൂല്യവും അഭൂതപൂർവമായ തലത്തിലേക്കാണ് കുതിക്കുന്നത്‌. തെന്നിന്ത്യൻ സിനിമയിലെ തന്നെ ഏറ്റവും വിലപിടിപ്പുള്ള താരങ്ങളിൽ ഒരാളായ മോഹൻലാൽ ഇന്ന് ആ ലിസ്റ്റിൽ ഏറ്റവും മുകളിലേക്കാണ് കുതിക്കുന്നത്‌. ഇപ്പോഴിതാ ദൃശ്യം 2 എന്ന ചിത്രത്തിന് പ്രശംസ എത്തിയിരിക്കുന്നത് ആഫ്രിക്കയിൽ നിന്നാണ്. ഘാന സ്വദേശിയായ പ്രശസ്ത ബ്ലോഗ്ഗർ ഫീഫി അദിൻക്രാ ആണ് ദൃശ്യം 2 നെ പുകഴ്ത്തി മുന്നോട്ടു വന്നിരിക്കുന്നത്. ലോക പ്രശസ്ത ത്രില്ലർ വെബ് സീരിസ് ആയ മണി ഹെയ്‌സ്റ്റിലെ പ്രൊഫസർ എന്ന ബുദ്ധി രാക്ഷസനായ കഥാപാത്രത്തെ മറന്നേക്കാനും അതിനേക്കാളും ജീനിയസ് ആണ് ദൃശ്യത്തിലെ മോഹൻലാൽ കഥാപാത്രമായ ജോർജുകുട്ടി എന്നും ഫീഫി പറയുന്നു.

മാത്രമല്ല, ദൃശ്യം 3 വരാനായി താൻ കാത്തിരിക്കുന്നു എന്നും ദൃശ്യവും, ദൃശ്യം 2 ഉം കണ്ടതിനു ശേഷം ഫീഫി കുറിച്ചു. ഏതായാലൂം വലിയ ശ്രദ്ധയാണ് വിദേശ രാജ്യങ്ങളിൽ ഈ ചിത്രത്തിന് ലഭിക്കുന്നത്. ഈ വർഷം ഫെബ്രുവരി പതിനെട്ടിന് ആണ് ആമസോൺ പ്രൈം റിലീസ് ആയി ദൃശ്യം 2 റിലീസ് ചെയ്തത്. നാൽപ്പതു കോടി രൂപയ്ക്കാണ് ദൃശ്യം 2 ആമസോൺ പ്രൈം വാങ്ങിയത് എന്നാണ് റിപ്പോർട്ടുകൾ പറയുന്നത്. മലയാള സിനിമയിലെ മാത്രമല്ല, തെന്നിന്ത്യൻ സിനിമയിലെ തന്നെ ഏറ്റവും വലിയ ഡിജിറ്റൽ റൈറ്റ്സിൽ ഒന്നാണ് ദൃശ്യം 2 തേടിയെടുത്തത്. ഇപ്പോൾ ഈ ചിത്രത്തിന്റെ തെലുങ്കു റീമേക് സംവിധാനം ചെയ്യുകയാണ് ജീത്തു ജോസഫ്.