തരംഗമായി സംസ്ഥാന- ദേശീയ പുരസ്‌കാരങ്ങൾ നേടിയ ബിരിയാണിയുടെ ട്രൈലെർ

ദേശീയ- സംസ്ഥാന ചലച്ചിത്ര അവാർഡുകൾ നേടി ഏറെ ശ്രദ്ധ നേടിയ മലയാള ചിത്രമാണ് കനി കുസൃതിയെ നായികയാക്കി സജിൻ ബാബു സംവിധാനം ചെയ്ത ബിരിയാണി. ഈ ചിത്രത്തിലെ പ്രകടനത്തിനാണ് കനി കുസൃതിക്ക് മികച്ച നടിക്കുള്ള സംസ്ഥാന ചലച്ചിത്ര പുരസ്‌കാരം ലഭിച്ചത്. ശൈലജ ജാല, സുർജിത് ഗോപിനാഥ്, അനിൽ നെടുമങ്ങാട് എന്നിവരും അഭിനയിച്ച ഈ ചിത്രം ദേശീയ ചലച്ചിത്ര പുരസ്‌കാരങ്ങൾ പ്രഖ്യാപിച്ചപ്പോൾ ജൂറിയുടെ പ്രത്യേക പരാമർശവും നേടിയെടുത്തു. ഇപ്പോഴിതാ ഈ ചിത്രത്തിന്റെ ട്രൈലെർ വലിയ പ്രേക്ഷക ശ്രദ്ധയാണ് നേടുന്നത്. വിവാഹിതരായ രണ്ടു മുസ്ലിം യുവതികൾ, മതവും സമൂഹവും സൃഷ്ടിച്ച വിലങ്ങുകളെ പൊട്ടിച്ചെറിഞ്ഞു കൊണ്ട് നടത്തുന്ന ജീവിത യാത്രയാണ് ഈ ചിത്രം നമ്മുക്ക് മുന്നിൽ എത്തിക്കുന്നത്.

ഇതിനോടകം അൻപതിലധികം അന്താരാഷ്ട്ര ഫിലിം ഫെസ്റ്റിവലുകളിൽ പ്രദർശിപ്പിച്ച ഈ ചിത്രം ഒട്ടേറെ പുരസ്കാരങ്ങളും നേടിയെടുത്തു. റോം ഫിലിം ഫെസ്റ്റിവലിൽ മികച്ച ചിത്രത്തിനുള്ള അവാർഡ് നേടിയ ബിരിയാണി, ബാംഗ്ലൂർ ഫിലിം ഫെസ്റ്റിവലിൽ ജൂറി അവാർഡും, ബോസ്റ്റൺ ഫിലിം ഫെസ്റ്റിവലിൽ മികച്ച ചിത്രത്തിനുള്ള പുരസ്‌കാരവും നേടി. സ്പെയിൻ, മോസ്‌കോ ഫിലിം ഫെസ്റ്റിവലുകളിൽ ഈ ചിത്രത്തിലെ പ്രകടനത്തിന് കനി കുസൃതി മികച്ച നടിക്കുള്ള അവാർഡും നേടി. സംവിധായകൻ സജിൻ ബാബു തന്നെ രചിച്ച ഈ ചിത്രത്തിന് സംഗീതം ഒരുക്കിയത് ലിയോ ടോമും ക്യാമറ ചലിപ്പിച്ചത് കാർത്തിക് മുത്തു കുമാറും ആണ്. അപ്പു എൻ ഭട്ടതിരി എഡിറ്റിംഗ് നിർവഹിച്ച ഈ ചിത്രം നിർമ്മിച്ചിരിക്കുന്നത് യു എ എൻ ഫിലിം ഹൗസ് ആണ്. ശ്യാം റെജി, മിനി ഐ ജി, തോന്നയ്ക്കൽ ജയചന്ദ്രൻ എന്നിവരും ഈ ചിത്രത്തിൽ അഭിനയിച്ചിട്ടുണ്ട്.