പരീക്ഷയ്ക്ക് പോലും ഞാൻ ഇത്ര കഷ്ടപ്പെട്ട് പഠിച്ചിട്ടില്ല, ദുൽഖർ തെലുങ്ക് ചിത്രത്തിനായി ഡബ്ബിങ് ആരംഭിച്ചു …

മലയാളികളുടെ പ്രിയ യുവനടൻ തിരക്കിലാണ്, അതേ ദുൽഖർ തന്റെ പുതിയ തെലുങ്ക് ചിത്രമായ മഹാനടിയുടെ ഡബ്ബിങ് തിരക്കിലാണ്. മലയാളത്തിലെ ഏറ്റവും താരമൂല്യമുള്ള നടനായി വളർന്ന ദുൽഖർ തമിഴിൽ വായ്മൂടി പേസവും എന്ന ചിത്രത്തിലൂടെ അവിടെ അരങ്ങേറ്റം നടത്തിയിരുന്നു. തുടർന്ന് മണി രത്നം ചിത്രമായ ഒകെ കണ്മണിയിലൂടെ തന്റെ പ്രഭാവം തമിഴിൽ ഊട്ടിയുറപ്പിച്ച ദുൽഖർ ബോളീവുഡിലേക്കും ചുവട് മാറി പരീക്ഷിക്കുകയാണ്, ഈ വർഷം. കർവാൻ എന്ന ഹിന്ദി ചിത്രത്തിലൂടെയാണ് ദുൽഖർ ബോളീവുഡിൽ അരങ്ങേറുന്നത്. ചിത്രത്തിൽ ബോളീവുഡ് സുന്ദരി മിതിലയാണ് നായിക. മറ്റ് ഇന്ഡസ്ട്രികളിൽ തിരക്കിലായ ദുൽഖർ തന്റെ പുതിയ തെലുങ്ക് ചിത്രമായ മഹനടിയുടെ വിശേഷങ്ങളാണ് പുതുതായി സോഷ്യൽ മീഡിയയിൽ പങ്കുവച്ചിരിക്കുന്നത്.

വിഖ്യാത തെലുങ്ക് നടിയായിരുന്ന സാവിത്രിയുടെ ജീവിതത്തെ ആസ്പദമാക്കി നാഗ് അശ്വിൻ സംവിധാനം ചെയ്യുന്ന ചിത്രമാണ് മഹാനടി. ചിത്രത്തിൽ സാവിത്രിയുടെ കഥാപാത്രത്തെ അവതരിപ്പിക്കുന്നത് കീർത്തി സുരേഷ് ആണ്. ദുൽഖർ സൽമാൻ ജെമിനി ഗണേശനെ അവതരിപ്പിക്കുന്നു. തന്റെ ആദ്യ ചിത്രം എന്ന നിലയിൽ ദുൽഖറും ആവേശത്തിലാണ്. ചിത്രത്തിന്റെ ഡബ്ബിങിനായി ദുൽഖർ സംഭാഷണങ്ങൾ പേപ്പറിലേക്ക് പകർത്തി തെലുങ്ക് പഠിക്കുന്ന ചിത്രമാണ് ഇപ്പോൾ സോഷ്യൽ മീഡിയയിലൂടെ പുറത്ത് വിട്ടിരിക്കുന്നത്. ” ഞാൻ പരീക്ഷയ്ക്ക് പോലും ഇത്രയുമധികം കഷ്ടപ്പെട്ടിട്ടില്ല “ എന്ന അടിക്കുറുപ്പോടെയാണ് ചിത്രം നൽകിയിരിക്കുന്നത്. ദുൽഖറിനെയും കീർത്തിയെയും കൂടാതെ സമന്തയും ചിത്രത്തിൽ ഒരു പ്രധാന വേഷം കൈകാര്യം ചെയ്യുന്നു. തമിഴിലും തെലുങ്കിലും ആയി ഒരുക്കുന്ന ചിത്രം മെയ് 9 ന് ചിത്രം തീയറ്ററുകളിൽ എത്തും.