ക്യാപ്റ്റൻ മില്ലറായി ധനുഷ്

തമിഴ് സൂപ്പർ താരം ധനുഷ് നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് ക്യാപ്റ്റൻ മില്ലർ. ഈ ചിത്രത്തിന്റെ പ്രഖ്യാപന വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലാവുന്നത്. സംവിധായകൻ അരുൺ മാതേശ്വരൻ ഒരുക്കാൻ പോകുന്ന ഈ ചിത്രം ഒരു ബിഗ് ബഡ്ജറ്റ് പാൻ ഇന്ത്യൻ ചിത്രമായാണ് എത്തുക. പിരിയഡ് ആക്ഷൻ ഡ്രാമയായാണ് ഈ ചിത്രം ഒരുക്കാൻ പോകുന്നത്. 1930 – 40 കാലഘട്ടങ്ങളിൽ മദ്രാസ് പ്രസിഡൻസിയുടെ പശ്ചാത്തലത്തിൽ കഥ പറയുന്ന ചിത്രമായിരിക്കുമിത്. വിസിൽ ശബ്ദത്തിന്റെ പശ്ചാത്തലത്തിൽ മുഖത്ത് സ്കാർഫ് ധരിച്ച് ബൈക്ക് ഓടിക്കുന്ന ധനുഷ് ആണ് ഇന്നലെ വന്ന പ്രഖ്യാപന വീഡിയോയുടെ ഹൈലൈറ്റ്. സത്യജ്യോതി ഫിലിംസ് നിർമ്മിക്കാൻ പോകുന്ന ഈ ചിത്രത്തിന് സംഗീത സംവിധാനം നിർവഹിക്കുന്നതു ജി വി പ്രകാശ് കുമാറാണ്. ഇത് വളരെ ആവേശകരമായ ഒരു ചിത്രമായിരിക്കുമെന്നാണ് ധനുഷ് ഈ വീഡിയോ പങ്കു വെച്ച് കൊണ്ട് സോഷ്യൽ മീഡിയയിൽ കുറിച്ചത്.

സംവിധായകൻ അരുൺ മതേശ്വരൻ തന്നെ രചനയും നിർവഹിക്കുന്ന ഈ ചിത്രം സെന്തിൽ ത്യാഗരാജനും, അർജുൻ ത്യാഗരാജനും ചേർന്നാണ് നിർമ്മിക്കുന്നത്. മൂന്നു വ്യത്യസ്ഥ ഗെറ്റപ്പുകളിലാണ് ധനുഷ് ഈ ചിത്രത്തിൽ പ്രത്യക്ഷപ്പെടുന്നത്. ശ്രേയാസ് കൃഷ്ണ ക്യാമറ ചലിപ്പിക്കാൻ പോകുന്ന ഈ ചിത്രത്തിന് മദൻ കാർക്കിയും പൂർണ്ണ രാമസ്വാമിയും ചെന്നാണ് സംഭാഷണങ്ങൾ രചിക്കുന്നത്. ഒരേസമയം തമിഴ്, തെലുങ്ക്, ഹിന്ദി ഭാഷകളിൽ റിലീസ് ചെയ്യാൻ പോകുന്ന ഈ ചിത്രത്തിന് സംഘട്ടന സംവിധാനം നിർവഹിക്കുന്നത്, ദിലീപ് സുബ്ബരായനാണ്. റോക്കി, സാനികായിധം എന്നിവയാണ് സംവിധായകൻ അരുൺ മാതേശ്വരന്റെ നേരത്തെ റിലീസ് ചെയ്തിട്ടുള്ള ചിത്രങ്ങൾ.