വിക്രമിലും ബീസ്റ്റിലും ഒരേ സ്റ്റണ്ട് ഷോട്ട്; വിശദീകരിച്ച് സംഘട്ടന സംവിധായകർ

തെന്നിന്ത്യൻ സിനിമയിലെ ഏറ്റവും മികച്ച രണ്ടു സംഘട്ടന സംവിധായകരാണ് അൻപ്- അറിവ് മാസ്റ്റേഴ്സ്. ഒട്ടേറെ വമ്പൻ ചിത്രങ്ങളിലെ സംഘട്ടന സംവിധാനം നിർവഹിച്ചിരിക്കുന്നത് ഈ ഇരട്ട സംഘട്ടന സംവിധായകരാണ്. ഇരട്ട സഹോദരന്മാരായ ഇവരുടെ സംഘട്ടനങ്ങളെ വ്യത്യസ്തരാകുന്നത് ഇവർ ഓരോ സംഘട്ടനത്തിലും കൊണ്ട് വരുന്ന വ്യത്യസ്തതയാണ്. തങ്ങളുടെ ഒരു ചിത്രത്തിൽ ഉപയോഗിക്കുന്ന സ്പെഷ്യൽ രീതികൾ മറ്റൊരു ചിത്രത്തിൽ ഉപയോഗിക്കാതെയിരിക്കാൻ തങ്ങൾ ഏറെ ശ്രദ്ധിക്കാറുമുണ്ടെന്നു ഇവർ പറയുന്നു. എന്നാൽ ഈ അടുത്തിടെ റിലീസ് ചെയ്ത വിക്രം എന്ന കമൽ ഹാസൻ- ലോകേഷ് കനകരാജ് ചിത്രത്തിലും, ബീസ്റ്റ് എന്ന തമിഴ് ചിത്രത്തിലും ഇവർ ഒരേപോലെ ഉപയോഗിച്ച ഒരു രീതിയാണ് ഷീൽഡ് ഉപയോഗിച്ച് കൊണ്ടുള്ള ഒരു ഗൺ ഫൈറ്റ്. അതെന്തുകൊണ്ടാണ് ഈ രണ്ടു ചിത്രത്തിലും ഒരേ രീതി ഉരുപയോഗിച്ചതെന്നും, ഇതൊരു സിഗ്നേച്ചർ സ്റ്റൈൽ ആയി ഉപയോഗിക്കാനുള്ള ശ്രമമാണോ എന്നും അടുത്തിടെ നടന്ന ഒരഭിമുഖത്തിൽ അവതാരക ഇവരോട് ചോദിച്ചതിന് ഇവർ നൽകുന്ന മറുപടി ശ്രദ്ധേയമാണ്.

ഈ സംഘട്ടന രീതി ഉപയോഗിക്കുന്നതിനെ കുറിച്ച് ദളപതി വിജയ്‌യും തങ്ങളോട് ചോദിച്ചിരുന്നു എന്നവർ പറയുന്നു. ബീസ്റ്റിൽ അതുപയോഗിച്ചത്, അതിലെ സംഘട്ടനം നടക്കുന്നത് ഒരു മാളിൽ ആയത് കൊണ്ടും അവിടെ അത്തരമൊരു കോറിഡോറിൽ നടക്കുന്ന സംഘട്ടനമായത് കൊണ്ട് തന്നെ വിജയ് കഥാപാത്രത്തിന് തടസ്സങ്ങളില്ലാതെ ഗൺ ഫൈറ്റ് നടത്താൻ, മറ്റു രണ്ടു പേരെ കൊണ്ട് വന്നു ഷീൽഡ് ബ്ലോക്ക് ഉണ്ടാക്കിയതാണെന്ന് അവർ വിശദീകരിക്കുന്നു. എന്നാൽ വിക്രമിൽ ഒരു പോലീസ് കഥ കൂടിയാണ് പറയുന്നതെന്നു കൊണ്ടും, അവിടെ ആ സംഘട്ടനം നടക്കുന്ന സ്ഥലത്തു അത്തരമൊരു രീതി ഉപയോഗിക്കാനുള്ള അവസരവും സാഹചര്യവും ഉള്ളതുകൊണ്ടുമാണ് അതിൽ ഷീൽഡ് ഫൈറ്റ് കൊണ്ട് വന്നതെന്നും അവർ വ്യക്തമാക്കി. ചിത്രങ്ങളിലെ സംഘട്ടനത്തിന്റെ സാഹചര്യങ്ങളും കഥാപാത്രങ്ങൾക്ക് ആ സമയത്തു എന്തൊക്കെ അവിടെ ലഭ്യമാകും എന്നതിനുമനുസരിച്ചാണ് സംഘട്ടന രംഗങ്ങളിലെ ശൈലികൾ തീരുമാനിക്കുന്നതെന്നാണ് അവർ വിശദമാക്കുന്നത്.