സിനിമയില്‍ അരങ്ങേറ്റത്തിനൊരുങ്ങി ക്രിക്കറ്റ് താരം ശിഖര്‍ ധവാന്‍..!

പ്രശസ്ത ഇന്ത്യൻ ക്രിക്കറ്റ് താരവും, ഇപ്പോൾ ഐപിഎലിൽ പഞ്ചാബ് കിഗ്സിന്റെ സ്റ്റാർ ബാറ്സ്മാനുമായ ശിഖർ ധവാൻ സോഷ്യൽ മീഡിയയിൽ കൂടിയും ജനപ്രിയനാണ്. ഗബ്ബർ എന്ന ഇരട്ടപ്പേരിൽ ക്രിക്കറ്റ് ഫീൽഡിൽ അറിയപ്പെടുന്ന ശിഖർ ധവാൻ തന്റെ സോഷ്യൽ മീഡിയ റീൽസിലൂടെ വലിയ ജനശ്രദ്ധയാണ് നേടുന്നത്. ദിനം പ്രതി രസകരമായ വീഡിയോകളാണ് ശിഖർ അഭിനയിച്ചു പുറത്തു വരുന്നത്. ചിലപ്പോൾ ഒറ്റക്കും, ചിലപ്പോൾ സഹതാരങ്ങളോടൊപ്പവുമാണ് ധവാന്റെ ഇത്തരം വീഡിയോകൾ വരുന്നത്. ഇപ്പോഴിതാ അദ്ദേഹം സിനിമയിലരങ്ങേറ്റം കുറിക്കുകയാണെന്ന വാർത്തകളാണ് വരുന്നത്. ഒരു വലിയ കമർഷ്യൽ ചിത്രത്തിലൂടെ ശിഖർ ധവാന്‍ അഭിനയരംഗത്തേക്ക് അരങ്ങേറ്റം കുറിക്കാന്‍ ഒരുങ്ങുകയാണെന്ന് പിങ്ക് വില്ലയാണ് റിപ്പോർട്ട് ചെയ്യുന്നത്. സിനിമയുടെ പേര് പുറത്തു വിട്ടിട്ടില്ലയെങ്കിലും, അതിന്റെ ചിത്രീകരണം പൂർത്തിയായെന്നാണ് അറിയാൻ സാധിക്കുന്നത്.

ശിഖര്‍ ധവാന് എല്ലായ്‌പ്പോഴും അഭിനേതാക്കളോട് വലിയ ബഹുമാനമുണ്ടായിരുന്നെന്നും, ഈ ചിത്രത്തിന്റെ ഭാഗമാകാന്‍ സാധിച്ചതില്‍ സന്തോഷമുണ്ടെന്നും അദ്ദേഹത്തോട് അടുത്ത വൃത്തങ്ങൾ പറയുന്നു. മാത്രമല്ല, ശിഖര്‍ കഥാപാത്രത്തിന് അനുയോജ്യമാണെന്ന് ചിത്രത്തിന്റെ അണിയറപ്രവര്‍ത്തകര്‍ കരുതുന്നുണ്ടെന്നും കുറച്ച് മാസങ്ങള്‍ക്ക് മുമ്പാണ് അവർ ശിഖറിനെ സമീപിച്ചതെന്നും ഇതൊരു മുഴുനീള വേഷമാണെന്നും അദ്ദേഹത്തോടടുത്ത വൃത്തങ്ങള്‍ അറിയിച്ചു. ചിത്രം ഈ വർഷം തന്നെ റിലീസിനെത്തുമെന്നാണ് പ്രതീക്ഷ. കഴിഞ്ഞ വർഷം, അക്ഷയ് കുമാർ ചിത്രമായ രാമ സേതുവിന്റെ ലൊക്കേഷൻ ധവാൻ സന്ദർശിച്ചിരുന്നു. അതോടെയാണ് ഈ ക്രിക്കറ്റ് താരത്തിന്റെ സിനിമാ പ്രവേശനം സംബന്ധിച്ച വാർത്തകൾ ചർച്ചയായത്. അന്ന് ധവാനൊപ്പം നടി ജാക്വലിന്‍ ഫെര്‍ണാണ്ടസും നുഷ്രത്ത് ബറൂച്ചയും ഉണ്ടായിരുന്നു. അക്ഷയ് കുമാറിന്റെ അടുത്ത സുഹൃത്താണ് ധവാൻ. അന്നദ്ദേഹം നടത്തിയതൊരു സൗഹൃദ സന്ദർശനം മാത്രമായിരുന്നെന്നും രാമ സേതുവിൽ ധവാൻ അഭിനയിച്ചിട്ടില്ല എന്നും പിന്നീടവർ വ്യക്തമാക്കി.