ബീസ്റ്റ് ചിത്രത്തിലെ വിജയ്‌യുടെ മാസ് വിമാന രംഗം; ചോദ്യങ്ങൾ ഒരുപാടുണ്ടെന്ന് ഐഎഎഫ് പൈലറ്റ്..!

ദളപതി വിജയ് നായകനായി എത്തിയ ഏറ്റവും പുതിയ തമിഴ് ചിത്രമാണ് ബീസ്റ്റ്. കഴിഞ്ഞ മാസം പതിമൂന്നിനാണ് ബ്രഹ്മാണ്ഡ റിലീസായി ഈ ചിത്രമെത്തിയത്. സമ്മിശ്ര പ്രതികരണമാണ് ബീസ്റ്റ് നേടിയതെങ്കിലും ബോക്സ് ഓഫീസിൽ ഇരുനൂറു കോടിക്കു മുകളിൽ കളക്ഷൻ നേടാൻ ഈ ചിത്രത്തിന് കഴിഞ്ഞു. ആക്ഷൻ, കോമഡി എന്നിവ കൂട്ടിക്കലർത്തിയൊരുക്കിയ ഈ ചിത്രം രചിച്ചു സംവിധാനം ചെയ്തത് നെൽസണും ഇത് നിർമ്മിച്ചത് സൺ പിക്ചേഴ്സുമാണ്. മെയ് പതിനൊന്നിനാണ് ബീസ്റ്റ് ഒറ്റിറ്റി റിലീസായി നെറ്റ്ഫ്ലിക്‌സിൽ റിലീസായത്. അതിനു പിന്നാലെ ഒട്ടേറെ ട്രോളുകളാണ് ഈ ചിത്രത്തിനും ഇതിലെ വിജയ് കഥാപാത്രത്തിനും ലഭിക്കുന്നത്. ഇപ്പോഴിതാ, ചിത്രത്തിലെ ക്ലൈമാക്സ് രംഗമായ വിമാന രംഗത്തിന്റെ വീഡിയോ പങ്കുവച്ചുകൊണ്ടുള്ള ഒരു ഐഎഎഫ് പൈലറ്റിന്റെ ട്വീറ്റ് വൈറലായി മാറുകയാണ്.

‘എനിക്ക് ഒരുപാട് ചോദ്യങ്ങളുണ്ട്’ എന്ന ക്യാപ്ഷനോടെയാണ് സജൻ എന്ന ആ പൈലറ്റ് ഈ വീഡിയോ പങ്കുവച്ചിരിക്കുന്നത്. അതോടെ ഈ രംഗം സോഷ്യൽ മീഡിയയിൽ വലിയ ചർച്ചയായി മാറിക്കഴിഞ്ഞു. ഈ രംഗത്തെ യുക്തിയില്ലായ്മയാണ് ചർച്ചാ വിഷയമാകുന്നത്. പാക്കിസ്ഥാനില്‍ നിന്നുള്ള ഒരു തീവ്രവാദിയെ വിജയ് ഫൈറ്റര്‍ ജെറ്റില്‍ കടത്തികൊണ്ടുവരുന്നതാണ് ഈ രംഗത്തിലുള്ളത്. വിജയ് തന്നെയാണ് ഫൈറ്റര്‍ ജെറ്റിന്റെ പൈലറ്റും. എന്നാൽ പാക്കിസ്ഥാന്‍ പട്ടാളം അവരുടെ ഫൈറ്റര്‍ ജെറ്റില്‍ നിന്ന് വിജയ്‌യുടെ ഫൈറ്റര്‍ ജെറ്റിന് നേരേ മിസൈല്‍ വിടുമ്പോള്‍ വിജയ് അതിനെ മറികടക്കുന്നത് വളരെ എളുപ്പത്തിലാണ്. ഈ ഒരു രംഗം സാമാന്യ യുക്തിയ്ക്ക് നിരക്കാത്തതാണെന്നു പ്രേക്ഷകർ പറയുന്നു. അതുപോലെ ഇനി സിനിമകൾ തെരഞ്ഞെടുക്കുമ്പോൾ വിജയ് തിരക്കഥയിൽ ശ്രദ്ധ കൊടുക്കണമെന്നും സംവിധായകര്‍ ഇത്തരം യുക്തിയില്ലാത്ത രംഗങ്ങളൊഴിവാക്കാൻ കുറച്ചെങ്കിലും ബുദ്ധിയുപയോഗിക്കണമെന്നുമാണ് ഇതിനെ വിമർശിക്കുന്നവർ പറയുന്നത്.