ലിജോ ജോസ് പെല്ലിശ്ശേരി- മമ്മൂട്ടി ചിത്രത്തെ കുറിച്ച് എനിക്കറിയാം; കൂടുതൽ വെളിപ്പെടുത്തി ചെമ്പൻ വിനോദ്..!

മെഗാ സ്റ്റാർ മമ്മൂട്ടിയെ നായകനാക്കി ലിജോ ജോസ് പെല്ലിശ്ശേരി ആദ്യമായി സംവിധാനം ചെയ്യുന്ന ചിത്രത്തിന്റെ ചിത്രീകരണം ഈ മാസം ആദ്യം പൂർത്തിയായിരുന്നു. തമിഴിലും മലയാളത്തിലുമായി ഒരുക്കുന്ന ഈ ചിത്രത്തിന്റെ ഷൂട്ടിംഗ് പഴനിയിൽ ആണ് നടന്നത്. നൻപകൽ നേരത്ത് മയക്കം എന്നാണ് ഈ ചിത്രത്തിന് നൽകിയിരിക്കുന്ന പേര്. തന്റെ പുതിയ നിർമ്മാണ കമ്പനിയായ മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നത് എസ് ഹരീഷ് ആണ്. ഒരു സാധാരണക്കാരൻ ആയാണ് മമ്മൂട്ടി ഈ ചിത്രത്തിൽ അഭിനയിക്കുന്നത് എന്നും, ഒരു കള്ളന്റെ വേഷത്തിലാണ് അദ്ദേഹം ഇതിൽ എത്തുന്നത് എന്നും സ്ഥിതീകരിക്കാത്ത റിപ്പോർട്ടുകൾ വന്നിരുന്നു. അതിനിടക്ക്, ഈ ചിത്രത്തിലെ മമ്മൂട്ടിയുടെ പ്രകടനം സംവിധായകന്റെ കണ്ണ് നനയിച്ചു എന്ന അനുഭവം താൻ അറിഞ്ഞു എന്ന് നടൻ ജയസൂര്യ പറഞ്ഞ വാക്കുകളും ഏറെ ശ്രദ്ധ നേടിയിരുന്നു.

ഇപ്പോഴിതാ ഈ ചിത്രത്തെ കുറിച്ച് പറയുന്നത് നടൻ ചെമ്പൻ വിനോദ് ആണ്. താൻ ഈ പടത്തിൽ അഭിനയിക്കുന്നില്ല എങ്കിലും തനിക്കു ഈ ചിത്രത്തെ കുറിച്ച് അറിയാം എന്നും, ഇതൊരു നല്ല സിനിമ ആയിരിക്കുമെന്നും അദ്ദേഹം പറയുന്നു. കൂടുതൽ വിവരങ്ങൾ പുറത്തു പറയുന്നത് ശരിയല്ല എന്ന് പറഞ്ഞ അദ്ദേഹം, ഈ ചിത്രത്തിലൂടെ മമ്മൂട്ടി എന്ന നടന്റെ പുതിയൊരു മുഖം കാണാൻ സാധിക്കുമെന്നാണ് പ്രതീക്ഷ എന്നും കൂട്ടിച്ചേർത്തു. ചെമ്പൻ വിനോദിന്റെ ഏറ്റവും അടുത്ത സുഹൃത്താണ് ലിജോ ജോസ് പെല്ലിശ്ശേരി. മമ്മൂട്ടിക്കൊപ്പം പ്രശസ്ത നടൻ അശോകനും ഈ ചിത്രത്തിൽ പ്രധാന വേഷം ചെയ്യുന്നുണ്ട്. തേനി ഈശ്വർ ക്യാമറ ചലിപ്പിച്ച ഈ ചിത്രത്തിൽ നടി രമ്യ പാണ്ഢ്യനും അഭിനയിക്കുന്നുണ്ട്.