കാർബൺ ട്രെയ്‌ലറും ഗാനങ്ങളും പ്രേക്ഷകർ ഏറ്റെടുക്കുന്നു; പ്രതീക്ഷകൾ ഏറി വരുന്നു..!

ഫഹദ് ഫാസിലിന്റെ ഈ വർഷത്തെ ആദ്യത്തെ റിലീസ് ആയി എത്തുന്ന ചിത്രമാണ് പ്രശസ്ത ഛായാഗ്രാഹകനും സംവിധായകനുമായ വേണു ഒരുക്കിയ കാർബൺ എന്ന ചിത്രം. ഈ വരുന്ന ജനുവരി 19 നു കാർബൺ കേരളത്തിലെ തീയേറ്ററുകളിൽ എത്തുമെന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. മമത മോഹൻദാസ് ആദ്യമായി ഫഹദ് ഫാസിലിന്റെ നായിക ആയെത്തുന്ന ഈ ചിത്രം നിർമ്മിച്ചിരിക്കുന്നത് പോയട്രി ഫിലിംസിന്റെ ബാനറിൽ സിബി കെ തോട്ടുപുറം, നാവിസ് സേവ്യർ എന്നിവർ ചേർന്നാണ്. മികച്ച രണ്ടു ഫസ്റ്റ് ലുക്ക് പോസ്റ്ററുകളിലൂടെ ആദ്യം സോഷ്യൽ മീഡിയയുടെ ശ്രദ്ധ നേടിയ ഈ ചിത്രം, പിന്നീട് ഇതിന്റെ ട്രൈലറിലൂടെയും സോങ് വിഡിയോകളിലൂടെയും വമ്പൻ പ്രതീക്ഷയാണ് പകർന്നു നൽകിയത്. ട്രെയ്‌ലറും സോങ് വീഡിയോകളും ഇതിനോടകം തന്നെ വമ്പൻ ഹിറ്റായി കഴിഞ്ഞു.

ഫഹദിനും മമത മോഹൻദാസിനുമൊപ്പം ദിലീഷ് പോത്തൻ, മണികണ്ഠൻ ആചാരി, സൗബിൻ ഷാഹിർ, നെടുമുടി വേണു, വിജയ രാഘവൻ, ഷറഫുദീൻ എന്നിവരും ഈ ചിത്രത്തിൽ അഭിനയിക്കുന്നുണ്ട്. പ്രശസ്ത ബോളിവുഡ് സംവിധായകൻ വിശാൽ ഭരദ്വാജ് സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് വേണ്ടി കാമറ ചലിപ്പിച്ചിരിക്കുന്നതു ഒരു ബോളിവുഡ് ക്യാമറാമാൻ ആണ്. മലയാളി കൂടിയായ കെ യു മോഹനൻ ആണ് ആ ബോളിവുഡ് ക്യാമറാമാൻ. ദയ, മുന്നറിയിപ്പ് എന്നീ ചിത്രങ്ങൾ നമ്മുക്ക് സമ്മാനിച്ച വേണു സംവിധാനം ചെയ്ത മൂന്നാമത്തെ ചിത്രമാണ് കാർബൺ. കാടിന്റെ പശ്ചാത്തലത്തിലും ഈ ചിത്രത്തിന്റെ കഥ പറയുന്നുണ്ടെന്നു ഇതിന്റെ ട്രൈലെർ സൂചന തരുന്നുണ്ട്. ഏതായാലും ഈ വർഷം പ്രേക്ഷകർ ഏറ്റവും കൂടുതൽ കാത്തിരിക്കുന്ന ഒരു ചിത്രമായി കാർബൺ മാറി കഴിഞ്ഞിട്ടുണ്ടെന്ന് പറയാം.