നവാഗത സംവിധായകനും പുതുമുഖ താരങ്ങളും എത്തുന്നു തീയേറ്ററുകൾ ഇളക്കിമറിക്കാൻ; ക്വീൻ വെള്ളിയാഴ്ച..!

ഈ വെള്ളിയാഴ്ച മുതൽ കേരളത്തിലെ പ്രദർശനശാലകളിൽ എത്തുന്ന ചിത്രമാണ് ക്യാമ്പസ് ഫൺ ഫിലിം ആയ ക്വീൻ. ഒരു കൂട്ടം പുതുമുഖങ്ങൾ ക്യാമറക്കു മുന്നിലും പിന്നിലും അണി നിരന്ന ചിത്രമാണ് ഇതെന്ന് നമ്മുക്ക് പറയാം. ഈ ചിത്രം സംവിധാനം ചെയ്തിരിക്കുന്നത് പുതുമുഖമായ ഡിജോ ജോസ് ആന്റണി ആണ്. അതുപോലെ ഈ ചിത്രം രചിച്ചിരിക്കുന്നതും പുതുമുഖങ്ങൾ ആയ ഷാരിസ് മുഹമ്മദ്, ജിബിൻ ജോസ് ആന്റണി എന്നിവർ ചേർന്നാണ്. ഈ ചിത്രത്തിലെ പ്രധാന കഥാപാത്രങ്ങളെ എല്ലാം തന്നെ അവതരിപ്പിക്കുന്നതും പുതുമുഖങ്ങൾ ആണ് എന്നതും ക്വീനിന്റെ സവിശേഷതയാണ്. എല്ലാം പുതുമുഖങ്ങൾ ആണെങ്കിലും ഇപ്പോൾ ഈ ചിത്രത്തിൽ വമ്പൻ പ്രതീക്ഷയാണ് പ്രേക്ഷകർ വെച്ച് പുലർത്തുന്നത്. ചിത്രത്തിന്റെ ടീസർ, ട്രൈലെർ, സോങ് വീഡിയോ എല്ലാം വമ്പൻ ഹിറ്റായി കഴിഞ്ഞു. അതോടു കൂടി ക്വീൻ തീയേറ്ററുകളിൽ എത്താൻ പ്രേക്ഷകർ കാത്തിരിക്കുന്ന അവസ്ഥയാണ് ഇപ്പോൾ ഉള്ളത്. യുവാക്കളും കോളേജ്- സ്കൂൾ സ്റുഡന്റ്സും ആണ് ഈ ചിത്രത്തിനായി ഏറെ കാത്തിരിക്കുന്നത് എന്ന് സോഷ്യൽ മീഡിയ ട്രെൻഡ് സൂചിപ്പിക്കുന്നു.

ഈ പുതുമുഖ സംവിധായകന്റെ ചിത്രം കേരളത്തിലെ തീയേറ്ററുകൾ ഇളക്കിമറിക്കുമോ എന്നാണ് ഇപ്പോൾ പ്രേക്ഷകർ ചോദിക്കുന്ന ചോദ്യം. കാരണം അത്രമാത്രം പ്രതീക്ഷയും ഹൈപ്പും ഈ സമയം കൊണ്ട് ക്വീൻ എന്നയീ കൊച്ചു ചിത്രം സൃഷ്ടിച്ചു കഴിഞ്ഞു. എഞ്ചിനീയറിംഗ് കോളേജിലെ മെക്കാനിക്കൽ എൻജിനീറിങ് വിഭാഗത്തിൽ പഠിക്കാൻ എത്തുന്ന ഒരേയൊരു പെൺകുട്ടിയെ ചുറ്റിപ്പറ്റിയാണ് ചിത്രത്തിന്റെ കഥ വികസിക്കുന്നതെന്നാണ് സൂചനകൾ പറയുന്നത്. ഷിബു കെ മൊയ്‌ദീൻ, റിൻഷാദ് വെള്ളോടത്തിൽ എന്നിവർ ചേർന്ന് അറേബിയൻ ഡ്രീംസ് എന്റെർറ്റൈന്മെന്റിന്റെ ബാനറിൽ ആണ് ഈ ചിത്രം നിർമ്മിച്ചിരിക്കുന്നത്. പുതുമുഖങ്ങൾക്കൊപ്പം വിജയ രാഘവൻ, നിയാസ് ബക്കർ, വിനോദ് കെടാമംഗലം എന്നിവരും ഈ ചിത്രത്തിൽ നിർണ്ണായക വേഷങ്ങൾ ചെയ്തിരിക്കുന്നു.