മമ്മൂട്ടിയും ദുൽഖറും ഒന്നിക്കുന്ന ചിത്രം… മറുപടിയുമായി മെഗാസ്റ്റാർ

മെഗാ സ്റ്റാർ മമ്മൂട്ടി ഭീഷ്മ പർവ്വം എന്ന തന്റെ പുതിയ ചിത്രത്തിന്റെ പ്രമോഷന്റെ ഭാഗമായി നൽകുന്ന അഭിമുഖങ്ങളിൽ പറയുന്ന കാര്യങ്ങൾ ആണ് ഇപ്പോൾ സോഷ്യൽ മീഡിയ ചർച്ച ചെയ്യുന്നത്. ഇപ്പോൾ ഓൺലൂകേർസ് മീഡിയക്ക് നൽകിയ അഭിമുഖത്തിൽ അദ്ദേഹം പറഞ്ഞ കാര്യങ്ങളും വൈറൽ ആവുകയാണ്. അതിൽ പ്രധാനപ്പെട്ട ഒന്നാണ്, മകനും യുവ താരവുമായ ദുൽഖർ സൽമാനുമൊത്തു ഒരു ചിത്രം ഉണ്ടാകുമോ എന്നത്. അത്തരമൊരു ചിത്രത്തിന് വേണ്ടി ആരാധകർ കാത്തിരിക്കുകയാണ് എന്നും കൂടി സൂചിപ്പിച്ചപ്പോൾ മമ്മൂട്ടി പറയുന്നത് അതൊന്നു അങ്ങനെ പ്ലാൻ ചെയ്യുന്നില്ല എന്നാണ്. നടക്കേണ്ട സമയം ആവുമ്പോൾ അതൊക്കെ അങ്ങ് നടക്കും എന്നും അതും പ്രതീക്ഷിച്ചോ പ്രതീക്ഷിക്കാതെയോ ആരും ഇരിക്കേണ്ട എന്നും അദ്ദേഹം പറയുന്നു. ദുൽഖർ മാത്രമല്ല വേറെ ഒരുപാട് യുവ താരങ്ങൾ മലയാളത്തിൽ ഉണ്ടെന്നും അവർക്കെല്ലാം ഒപ്പം നമ്മുക്ക് അഭിനയിക്കാൻ പറ്റുമോ എന്നും മമ്മൂട്ടി ചോദിക്കുന്നു.

ദുൽഖറിനും ഫഹദിനും ഒക്കെ ഒപ്പം അഭിനയിക്കാൻ അവസരം വന്നാൽ, അത് ചെയ്യാൻ പറ്റുന്ന ഒന്നാണെങ്കിൽ ചെയ്യും എന്നല്ലാതെ, അതിനു വേണ്ടി ഒരു സിനിമ ചെയ്യാൻ തല്ക്കാലം പ്ലാനില്ല എന്നും മമ്മൂട്ടി സൂചിപ്പിക്കുന്നു. അമൽ നീരദ് ഒരുക്കിയ ഭീഷ്മ പർവ്വം മാർച്ച് മൂന്നിന് ആണ് റിലീസ് ചെയ്യുന്നത്. അമൽ നീരദ് തന്നെ തന്നെ നിർമ്മിച്ചിരിക്കുന്ന ഈ ചിത്രം രചിച്ചത് അമൽ നീരദും നവാഗതനായ ദേവദത് ഷാജിയും ചേർന്നാണ്. അതേ ദിവസം തന്നെ ദുൽഖർ നായകനായ തമിഴ് ചിത്രവും റിലീസ് ചെയ്യുന്നുണ്ട്. ബ്രിന്ദ മാസ്റ്റർ ഒരുക്കിയ ഈ ചിത്രത്തിന്റെ പേര് ഹേ സിനാമിക എന്നാണ്.