പുതിയ തെന്നിന്ത്യൻ റെക്കോർഡ് സൃഷ്ടിച്ചു ദളപതി വീണ്ടും; ബീസ്റ്റിലെ അറബിക് കുത്ത് ഗാനം ട്രെൻഡിങ്.!

ഇന്നലെ വൈകുന്നേരമാണ് ദളപതി വിജയ് നായകനായി എത്തുന്ന ബീസ്റ്റ് എന്ന ചിത്രത്തിലെ അറബിക് കുത്ത് സോങ് റിലീസ് ചെയ്തത്. നെൽസൺ ദിലീപ്കുമാർ സംവിധാനം ചെയ്ത ഈ ചിത്രത്തിന് വേണ്ടി സംഗീതമൊരുക്കിയത് അനിരുദ്ധ് രവിചന്ദർ ആണ്. അദ്ദേഹം ഈണം പകർന്ന ഈ ഗാനത്തിന് വരികൾ രചിച്ചത് തമിഴ് യുവ സൂപ്പർ താരം ശിവകാർത്തികേയനും ഈ ഗാനം ആലപിച്ചത് അനിരുദ്ധ് രവിചന്ദർ, ജോണിത ഗാന്ധി എന്നിവർ ചേർന്നുമാണ്. അറബിക് സ്റ്റൈൽ മ്യൂസിക്, വരികൾ എന്നിവക്കൊപ്പം തമിഴ് ബീറ്റുകൾ മിക്സ് ചെയ്തു ഒരുക്കിയ ഈ ഗാനത്തിന്റെ ലിറിക് വീഡിയോ ആണ് റിലീസ് ചെയ്തത്. അതിനൊപ്പം തന്നെ വിജയ്, പൂജ ഹെഗ്‌ഡെ എന്നിവരുടെ കിടിലൻ നൃത്ത ചുവടുകളും ഈ വീഡിയോയിൽ ഉൾപ്പെടുത്തിയിട്ടുണ്ട്. എന്തായാലും റിലീസ് ചെയ്ത നിമിഷം മുതൽ ട്രെൻഡിങ് ആയ ഈ ഗാനം ഇപ്പോൾ പുതിയ തെന്നിന്ത്യൻ റെക്കോർഡ് കൂടി സൃഷ്ടിച്ചിരിക്കുകയാണ്. ആദ്യ ദിനം ഏറ്റവും കൂടുതൽ യൂട്യൂബ് കാഴ്ചക്കാരെ ലഭിക്കുന്ന തെന്നിന്ത്യൻ ലിറിക് വീഡിയോ ആണ് ഇപ്പോൾ ഈ അറബിക് കുത്ത് സോങ് ലിറിക് വീഡിയോ.

ഇതിനോടകം 17 മില്യണിൽ അധികം കാഴ്ചക്കാരെ നേടിയ ഈ വീഡിയോ ഏകദേശം 2 മില്യൺ ലൈക്‌സും നേടിയാണ് റെക്കോർഡ് ഇട്ടതു. 14.73 മില്യൺ വ്യൂസ് നേടിയ കലാവതി എന്ന തെലുങ്കു ലിറിക് വീഡിയോ ഇട്ട റെക്കോർഡ് ആണ് ഈ അറബിക് കുത്ത് സോങ് ലിറിക്കൽ വീഡിയോ മറികടന്നത്. മഹേഷ് ബാബു- കീർത്തി സുരേഷ് ടീം അഭിനയിച്ച സർക്കാരു വാരി പാട്ട എന്ന ചിത്രത്തിലെ കലാവതി എന്ന ഗാനം ഇന്നലെയാണ് ആ റെക്കോർഡ് സൃഷ്ടിച്ചത് എങ്കിൽ ഒറ്റ ദിവസം കഴിഞ്ഞപ്പോൾ തന്നെ ബീസ്റ്റ് ഗാനം ആ റെക്കോർഡ് സ്വന്തം പേരിലാക്കി. പരശുറാം സംവിധാനം ചെയ്തിരിക്കുന്ന മഹേഷ് ബാബു ചിത്രത്തിന് സംഗീതം ഒരുക്കിയത് തമൻ എസ് ആണ്. ബീസ്റ്റ്‌ എന്ന ദളപതി ചിത്രം നിർമ്മിച്ചിരിക്കുന്നത് സൺ പിക്ചേഴ്സ് ആണ്.