അഭിനന്ദിച്ചു മോഹൻലാൽ, അനുഗ്രഹിച്ചു മമ്മൂട്ടി; മരക്കാരിലും മധുര രാജയിലും അഭിനയിച്ചു ജി സുരേഷ് കുമാർ..!

മലയാള സിനിമയിലെ പ്രമുഖ നിർമ്മാതാക്കളിൽ ഒരാളാണ് ജി സുരേഷ് കുമാർ. നാൽപ്പതു വർഷത്തിൽ അധികമായി സിനിമയിൽ ഉള്ള അദ്ദേഹം ഇതുവരെ മുപ്പത്തിമൂന്നു ചിത്രങ്ങൾ ആണ് നിർമ്മിച്ചത്. മലയാളത്തിന്റെ താര ചക്രവർത്തി മോഹൻലാലും മാസ്റ്റർ ഡയറക്ടർ പ്രിയദർശനും തുടങ്ങി ഒട്ടനേകം പ്രമുഖരുടെ ഏറ്റവും അടുത്ത സുഹൃത്താണ് ജി സുരേഷ് കുമാർ എങ്കിലും സിനിമാഭിനയത്തിലേക്കു സുരേഷ് കുമാർ രണ്ടു വർഷം മുൻപ് വരെ കടന്നിരുന്നില്ല. എന്നാൽ അരുൺ ഗോപി ഒരുക്കിയ ദിലീപ് ചിത്രമായ രാമലീലയിൽ ആണ് മികച്ച ഒരു വേഷം ചെയ്തു കൊണ്ട് അദ്ദേഹം അരങ്ങേറിയത്. ആ ചിത്രം കണ്ട മോഹൻലാൽ അഭിനന്ദിക്കുക കൂടി ചെയ്തതോടെ സുരേഷ് കുമാറിന് ആത്മവിശ്വാസമായി.

ഇപ്പോൾ മലയാളത്തിലെ ബിഗ് ബജറ്റ് ചിത്രങ്ങളുടെ ഭാഗമാണ് ജി സുരേഷ് കുമാർ എന്ന നടൻ. മോഹൻലാലിൻറെ പ്രിയദർശൻ ചിത്രമായ മരക്കാർ: അറബിക്കടലിന്റെ സിംഹത്തിൽ സുരേഷ് കുമാർ അഭിനയിച്ചത് പ്രണവ് മോഹൻലാലിന് ഒപ്പമാണ്. കൊച്ചീ രാജാവിന്റെ വേഷമാണ് ജി സുരേഷ് കുമാർ ഇതിൽ അഭിനയിച്ചത്. ഇത് കൂടാതെ മധുര രാജ എന്ന വൈശാഖ് ചിത്രത്തിൽ മമ്മൂട്ടിയോട് ഒപ്പവും ജി സുരേഷ് കുമാർ അഭിനയിച്ചു. ആദ്യ ഷോട്ടിന് മുൻപ് മമ്മൂട്ടിയുടെ അനുഗ്രഹം വാങ്ങിയിട്ടാണ് താൻ അഭിനയിച്ചത് എന്ന് സുരേഷ് കുമാർ പറയുന്നു. തെന്നിന്ത്യൻ സൂപ്പർ നായികയായ കീർത്തി സുരേഷ് ആണ് ജി സുരേഷ് കുമാറിന്റെ മകൾ. മറ്റൊരു മകൾ ആയ രേവതി പ്രിയദർശന്റെ അസിസ്റ്റന്റ് ഡയറക്ടർ ആണ്. ജി സുരേഷ് കുമാറിന്റെ ഭാര്യ മേനകയും ഒരുകാലത്തെ പ്രശസ്ത നായിക ആയിരുന്നു.