അഭിനയത്തിന് പുറമേ സംവിധായകനായും എ എം ആരിഫ് എം പി..!!

ആലപ്പുഴയിൽ നിന്നുള്ള കമ്മ്യൂണിസ്റ്റ് പാർട്ടിയുടെ ഇപ്പോഴത്തെ എം പി ആണ് എ എം ആരിഫ്. അരൂരിൽ നിന്നുള്ള നിയമസഭാ സാമാജികൻ ആയിരുന്ന ആരിഫ് ഈ വർഷം നടന്ന ലോക സഭ തിരഞ്ഞെടുപ്പിൽ ആണ് എം പി ആയി തിരഞ്ഞെടുക്കപ്പെട്ടത്. കേരളത്തിൽ നിന്നുള്ള ഒരേയൊരു കമ്മ്യൂണിസ്റ്റ് പാർട്ടി എം പി കൂടിയാണ് ആരിഫ് എന്നതും ശ്രദ്ധേയമാണ്. കേരളാ രാഷ്ട്രീയത്തിലെ ഏറ്റവും സുന്ദരനായ ജനനായകന്മാരിൽ ഒരാൾ എന്ന വിശേഷണവും എ എം ആരിഫിന് സ്വന്തമാണ്. ഇപ്പോഴിതാ സിനിമയിലും ഒരു കൈ നോക്കുകയാണ് ഈ രാഷ്ട്രീയ നായകൻ.

അഭിനേതാവായി മാത്രമല്ല, സംവിധായകൻ ആയി കൂടിയുമാണ് എ എം ആരിഫ് എം പി സിനിമയിൽ എത്തുന്നത്. പ്രശസ്ത താരങ്ങളായ സിജു വിൽസൺ, സൈജു കുറുപ്പ് എന്നിവരെ നായകന്മാരാക്കി അരുൺ വൈഗ സംവിധാനം ചെയ്യുന്ന ഉപചാരപൂർവം ഗുണ്ടാ ജയൻ എന്ന ചിത്രത്തിലാണ് എ ആം ആരിഫ് കൂടി ഭാഗമാകുന്നത്‌. ഈ ചിത്രത്തിന്റെ അണിയറ പ്രവർത്തകരുടെ ക്ഷണം സ്വീകരിച്ചു കൊണ്ട് ചേർത്തലയിൽ നടക്കുന്ന ഈ ചിത്രത്തിന്റെ ഷൂട്ടിംഗ് ലൊക്കേഷനിൽ എത്തിയ എ.എം. ആരിഫ്, ഈ ചിത്രത്തിന്റെ സംവിധായകൻ അരുൺ വൈഗയുടെ നിർബന്ധത്തിന് വഴങ്ങി ഇതിലെ ഒരു സീനിൽ അഭിനയിക്കുകയും അതോടൊപ്പം ഇതിലെ ഒരു സീൻ ആക്ഷനും കട്ടും പറഞ്ഞ് സംവിധാനവും ചെയ്യുകയായിരുന്നു. പുതുമുഖങ്ങൾ നായികാ വേഷത്തിൽ എത്തുന്ന ഈ ചിത്രത്തിൽ പ്രശസ്ത ഹാസ്യ താരം ഹരീഷ് കണാരനും പ്രധാന വേഷം ചെയ്യുന്നുണ്ട്.