സൂര്യ നിർമ്മിച്ച വിരുമൻ കാർത്തിയുടെ കരിയർ ബെസ്റ്റ് ബോക്സ് ഓഫീസ് ഓപ്പണർ; കളക്ഷൻ റിപ്പോർട്ട് ഇതാ

തമിഴിലെ യുവ താരം കാർത്തി നായകനായി എത്തിയ ഏറ്റവും പുതിയ ചിത്രമാണ് വിരുമൻ. മുത്തയ്യ സംവിധാനം ചെയ്ത ഈ ആക്ഷൻ എന്റെർറ്റൈനെർ ഗ്രാമീണ പശ്‌ചാത്തലത്തിലൊരുക്കിയ മാസ്സ് ചിത്രമാണ്. 2ഡി എന്റര്‍ടെയ്ന്‍മെന്റിന്റെ ബാനറില്‍ സൂര്യയും ജ്യോതികയും ചേർന്ന് നിർമ്മിച്ച ഈ ചിത്രം ഇപ്പോൾ കാർത്തിയുടെ കരിയറിലെ തന്നെ ഏറ്റവും മികച്ച ബോക്സ് ഓഫിസ് ഓപ്പണിങ് കളക്ഷനാണ് നേടിയിരിക്കുന്നത്. മുത്തയ്യ തന്നെ തിരക്കഥയും എഴുതിയ ഈ ചിത്രം ആദ്യ ദിവസം നേടിയത് 8.2 കോടി രൂപയാണ്. രണ്ടാം ദിവസവും വമ്പൻ കളക്ഷൻ നേടിയ ചിത്രം മഹാവിജയത്തിലേക്കാണ് കുതിക്കുന്നതെന്നാണ് റിപ്പോർട്ടുകൾ പറയുന്നത്. കേരളത്തിലും മികച്ച കളക്ഷൻ ആണ് ഈ ചിത്രത്തിന് ലഭിക്കുന്നത്. യുവൻ ശങ്കർ രാജ സംഗീതമൊരുക്കിയ ഈ ചിത്രത്തിൽ രാജ് കിരൺ, പ്രകാശ് രാജ്, സൂരി എന്നിവരും അഭിനയിച്ചിട്ടുണ്ട്.

അച്ഛനും മകനുമായാണ് ഈ ചിത്രത്തിൽ പ്രകാശ് രാജ്, കാർത്തി എന്നിവർ അഭിനയിച്ചിരിക്കുന്നത്. എസ് കെ സെല്‍വകുമാറാണ് ഈ ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത്‌. സൂപ്പർ ഹിറ്റ് തമിഴ് സംവിധായകൻ ഷങ്കറിന്റെ ഇളയ മകളാണ് ചിത്രത്തിലെ നായികയായ അതിഥി ഷങ്കര്‍ എന്ന പ്രത്യേകതയുമുണ്ട്. കാര്‍ത്തിയും മുത്തയ്യയും ഇതിനു മുൻപ് ഒന്നിച്ചത് കൊമ്പൻ എന്ന സൂപ്പർ ഹിറ്റ് ചിത്രത്തിന് വേണ്ടിയായിരുന്നു. ഈ കൂട്ടുകെട്ട് വിജയമാവർത്തിക്കുന്ന കാഴ്ചയാണ് ഇപ്പോൾ നമ്മുക്ക് കാണാൻ സാധിക്കുന്നത്. പി എസ് മിത്രൻ ഒരുക്കിയ സർദാർ ആണ് ഇനി കാർത്തി നായകനായി റിലീസ് ചെയ്യാനുള്ള ചിത്രം. വിരുമൻ നേടുന്ന ഈ വിജയം ആ ചിത്രത്തിനും ഗുണം ചെയ്യുമെന്നാണ് സൂചന.