ചിരിയുടെ പുത്തന്‍കൂട്ടുകെട്ടുമായി മഞ്ജു വാര്യരും സൗബിൻ ഷാഹിറും; വെള്ളരിക്കാപട്ടണം മേക്കിങ് വീഡിയോ കാണാം..!

മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യരും, നടനും സംവിധായകനുമായ സൗബിൻ ഷാഹിറും ഒന്നിക്കുന്ന പുതിയ ചിത്രമാണ് വെള്ളരിക്കാപ്പട്ടണം. ഇരുവരും പ്രധാന വേഷങ്ങൾ ചെയ്യുന്ന ഈ ചിത്രത്തിന്റെ മേക്കിങ് വീഡിയോ ആണ് ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. പൊട്ടിച്ചിരിയുടെ പുതിയ കാഴ്ചകളാണ് ഈ മേക്കിങ് വീഡിയോ നമ്മുക്ക് സമ്മാനിക്കുന്നത്. മഞ്ജുവാര്യരും സൗബിന്‍ഷാഹിറും ചേര്‍ന്ന് ഒരുക്കുന്ന തമാശയും കൗതുക കാഴ്ചകളുമാണ് ഈ വീഡിയോയുടെ മുഖ്യ ആകര്‍ഷണം എന്ന് തന്നെ പറയാം. ഒരുപാട് നര്‍മ നിമിഷങ്ങള്‍ കോര്‍ത്തിണക്കിയ ഹൃദ്യമായ കുടുംബചിത്രമായിരിക്കും പ്രേക്ഷകരെ കാത്തിരിക്കുന്നത് എന്ന് ഇതിലെ ദൃശ്യങ്ങള്‍ സൂചിപ്പിക്കുന്നു. ഫുള്‍ ഓണ്‍ സ്റ്റുഡിയോസ് നിര്‍മിക്കുന്ന വെള്ളരിക്കാപട്ടണത്തിന്റെ സംവിധാനം മഹേഷ് വെട്ടിയാറാണ്. മാധ്യമപ്രവര്‍ത്തകനായ ശരത്കൃഷ്ണയും സംവിധായകനും ചേര്‍ന്നാണ് ഈ ചിത്രത്തിന്റെ രചന നിർവഹിച്ചിരിക്കുന്നത്.

അലക്സ് ജെ.പുളിക്കല്‍ ക്യാമറ ചലിപ്പിച്ചിരിക്കുന്ന ഈ ചിത്രത്തിൻറെ പ്രധാന ലൊക്കേഷനുകള്‍ മാവേലിക്കരയും വെണ്മണിയുമാണ്. മഞ്ജുവാര്യര്‍ക്കും സൗബിനും പുറമേ പ്രശസത താരങ്ങളായ സലിംകുമാര്‍, സുരേഷ്‌കൃഷ്ണ, കൃഷ്ണശങ്കര്‍, ശബരീഷ് വര്‍മ, ഇടവേള ബാബു, അഭിരാമി ഭാര്‍ഗവന്‍, കോട്ടയം രമേശ്, വീണനായര്‍, പ്രമോദ് വെളിയനാട്, യൂട്യൂബ് സെൻസേഷൻ ശ്രീകാന്ത് വെട്ടിയാര്‍ തുടങ്ങിയവര്‍ ഈ ചിത്രത്തില്‍ അഭിനയിക്കുന്നു. അപ്പു ഭട്ടതിരിയും അർജു ബെന്നും ചേർന്ന് എഡിറ്റിങ് നിർവഹിച്ച ഈ ചിത്രത്തിന് വേണ്ടി വരികൾ രചിച്ചത് മധുവാസുദേവനും വിനായക് ശശികുമാറുമാണ്. സച്ചിന്‍ ശങ്കര്‍ മന്നത്ത് ആണ് വെള്ളരിക്കാപ്പട്ടണത്തിനു വേണ്ടി ഗാനങ്ങൾ ഒരുക്കിയത്. ജ്യോതിഷ് ശങ്കറാണ് ഈ ചിത്രത്തിന്റെ പ്രൊഡക്ഷന്‍ ഡിസൈനര്‍. ബെന്നി കട്ടപ്പന പ്രൊഡക്ഷന്‍ കണ്‍ട്രോളര്‍ ആയി ജോലി ചെയ്ത ഈ ചിത്രത്തിന്റെ അസോസിയേറ്റ് ഡയറക്ടര്‍മാര്‍ ശ്രീജിത് നായരും കെ.ജി.രാജേഷ് കുമാറുമാണ്. എ.എസ്.ദിനേശ് ആണ് ഇതിന്റെ പി.ആര്‍.ഒ.