പ്രണവിന് പിന്നാലെ ആയോധന കലയിൽ അഭ്യാസം നേടി വിസ്മയ മോഹൻലാലും..!

മലയാളത്തിന്റെ മെഗാ താരം മോഹൻലാലിന്റെ മകൻ പ്രണവ് മോഹൻലാൽ ഇപ്പോൾ പ്രേക്ഷകർക്ക് സുപരിചിതനായ യുവ താരമാണ്. നായകനായി എത്തിയ ആദി എന്ന ആദ്യ ചിത്രം തന്നെ ബ്ലോക്ക്ബസ്റ്റർ വിജയമാക്കിയ പ്രണവ് കയ്യടി നേടിയത് ആ ചിത്രത്തിലെ ത്രസിപ്പിക്കുന്ന ആക്ഷൻ രംഗങ്ങൾ കൊണ്ടാണ്. പാർക്കർ എന്ന സംഘട്ടന രീതിയിൽ ഗംഭീര മികവ് പുലർത്തുന്ന പ്രണവ്, ജിംനാസ്റ്റിക്‌സ്, പാർവതാരോഹണം എന്നിവയിലും പരിശീലനം നേടിയ വ്യക്തിയാണ്. എന്നാൽ ഇപ്പോഴിതാ പ്രണവിന് പിന്നാലെ സഹോദരിയായ വിസ്മയയും ആയോധന കലയിൽ പരിശീലനം നേടുന്ന ഒരു വീഡിയോയാണ് സോഷ്യൽ മീഡിയയിൽ വൈറലാകുന്നത്. ഇന്ത്യ ലോക്ക് ഡൗണിലാണെങ്കിലും വിസ്മയ ഇപ്പോഴുള്ളത് തായ്ലാൻഡിലാണ്.

അവിടെ വെച്ചു മുയ് തായ് എന്ന ആയോധന കലയാണ് വിസ്മയ മോഹൻലാൽ പരിശീലിക്കുന്നത്. വിസ്മയ തന്നെയാണ് താൻ അത് പരിശീലിക്കുന്ന വീഡിയോ ഇൻസ്റ്റാഗ്രാമിൽ പോസ്റ്റ് ചെയ്തത്. മായ എന്നു വിളിക്കുന്ന വിസ്മയ പഠനത്തിന്റെ ഭാഗമായാണ് വിദേശത്തേക്ക് പോയത്. ഒരു കലാകാരി കൂടിയായ വിസ്മയ മോഹൻലാൽ താനെഴുതിയ കവിതകളും വരച്ച ചിത്രങ്ങളുമൊക്കെ ചേർത്ത് ഒരു ബുക്ക് പബ്ലിഷ് ചെയ്തിരുന്നു. ഗ്രൈൻസ് ഓഫ് സ്റ്റാർ ഡസ്റ്റ് എന്നാണ് വിസ്മയ പ്രസിദ്ധീകരിച്ച ബുക്കിന്റെ പേര്‌. തന്റെ ബുക്കിന്റെ കവർ പേജ് അടക്കം ഇൻസ്റ്റാഗ്രാമിൽ പോസ്റ്റ് ചെയ്തു കൊണ്ട് വിസ്മയ തന്നെയാണ് ഈ കഴിഞ്ഞ ജനുവരിയിൽ ബുക് പ്രസിദ്ധീകരിക്കുന്ന വിവരം ഏവരുമായും പങ്കു വെച്ചത്. കുറച്ചു കാലം മുൻപ് വരേയും അധികമൊന്നും പൊതു പരിപാടികളിലും മറ്റും വിസ്മയ പ്രത്യക്ഷപ്പെടാറുണ്ടായിരുന്നില്ല. കുറച്ചു നാൾ മുൻപ് മോഹൻലാൽ മകൾക്ക് ജന്മദിന ആശംസകൾ അറിയിച്ചു കൊണ്ടിട്ട ഇൻസ്റ്റാഗ്രാം പോസ്റ്റും ഏറെ ശ്രദ്ധ നേടിയെടുത്തിരുന്നു.