ആരാധകന്റെ മകളുടെ വിവാഹത്തിന് കുടുംബ സമേതനായി എത്തി ദളപതി വിജയ്; വീഡിയോ കാണാം..!

തമിഴകത്തിന്റെ ദളപതി വിജയ്ക്ക് തന്റെ ആരാധകരോടുള്ള സ്നേഹം വളരെ പ്രസിദ്ധമാണ്. ആരാധകരെ സ്വന്തം കൂടെപ്പിറപ്പുകളെ പോലെ കാണുന്ന വിജയ് അവർക്കു എന്ത് ആവശ്യമുണ്ടായാലും അവരോടൊപ്പം ഉണ്ടാകും. അവർക്കു ഒരപകടം പറ്റിയാൽ പോലും ആദ്യം സഹായത്തിനായി ഓടിയെത്തുന്നത് വിജയ് ആണ്. ആരാധകരുടെ ഇടയിൽ തമിഴൻ എന്നോ മലയാളി എന്നോ ഉള്ള വ്യത്യാസം വിജയ് കാണിക്കാറില്ല. തന്റെ മലയാളി ആരാധകരെയും എപ്പോഴും സഹായിക്കാൻ എത്തുന്ന താരമാണ് വിജയ്. അതുകൊണ്ട് തന്നെ തമിഴ് നാട്ടിലെ പുതു തലമുറയിലെ ഏറ്റവും പോപ്പുലർ ആയ താരം ആര് എന്ന ചോദ്യത്തിന് വിജയ് എന്ന ഒരു ഉത്തരമേ ഉള്ളു. സൂപ്പർ സ്റ്റാർ രജനികാന്ത് കഴിഞ്ഞാൽ ആ സ്ഥാനം അവിടെ കയ്യാളുന്നത് വിജയ് ആണ്. അദ്ദേഹത്തിന്റെ ഈ എളിമയും ലാളിത്യവുമാണ് അദ്ദേഹത്തെ ജനങ്ങളുടെ ഇടയിലും ആരാധകരുടെ ഇടയിലും സൂപ്പർ ഹീറോ ആക്കുന്നത്.

ഇപ്പോഴിതാ തന്റെ ഒരു ആരാധകന്റെ മകളുടെ കല്യാണത്തിന് വിജയ് എത്തിയത് കുടുംബ സമേതമാണ്. തന്റെ ഭാര്യ സംഗീതക്ക് ഒപ്പം വിജയ് കല്യാണത്തിന് എത്തിയ വീഡിയോ ഇപ്പോൾ സോഷ്യൽ മീഡിയയിൽ തരംഗമായി മാറി കഴിഞ്ഞു. ആ വീഡിയോ നിങ്ങൾക്ക് ഇവിടെ കാണാം.

വിജയ്‌യുടെ ഒഫീഷ്യൽ ഫാൻസ്‌ അസോസിയേഷൻ ആയ വിജയ് മക്കൾ ഇയക്കത്തിന്റെ സെക്രട്ടറി ആയ ബി സി ആനന്ദിന്റെ മകളുടെ വിവാഹത്തിൽ പങ്കെടുക്കാൻ ആണ് സൂപ്പർ താരം കുടുംബ സമേതനായി എത്തിയത്. വിജയ് എത്തിയതോടെ ആരാധകരും ജനങ്ങളും ഏറെ ആവേശത്തിലായി. പോണ്ടിച്ചേരിയിൽ വെച്ചായിരുന്നു വിവാഹ ചടങ്ങു നടന്നത്. വിജയ് എത്തുമോ എന്നുള്ള കാര്യം ആദ്യം ഉറപ്പില്ലായിരുന്നു എങ്കിലും ആരാധകർ വിശ്വസിച്ചിരുന്നത് അദ്ദേഹം എത്തും എന്ന് തന്നെയായിരുന്നു. വരനും വധുവിനും ആശംസകൾ നേർന്ന താരം വലിയ തിരക്ക് മൂലം ഉണ്ടാകുന്ന പ്രശ്നങ്ങൾ ഒഴിവാക്കാൻ വേഗം തന്നെ മടങ്ങുകയും ചെയ്തു.