മനോഹരമായ ദൃശ്യങ്ങളുമായി ജോസഫിലെ സോങ് വീഡിയോ എത്തി; ഹൃദയം കൊണ്ട് സ്വീകരിച്ചു സോഷ്യൽ മീഡിയ..!

പ്രശസ്ത സംവിധായകനായ എം പദ്മകുമാർ സംവിധാനം നിർവഹിച്ച ജോസഫ് എന്ന ചിത്രമാണ് കേരളത്തിൽ ഇന്ന് സംസാര വിഷയം. ജോജു ജോർജ് നായകനായി എത്തിയ ഈ ത്രില്ലർ ഗംഭീര പ്രേക്ഷക പ്രതികരണവും ഒപ്പം നിരൂപക പ്രശംസയും നേടി മുന്നേറുകയാണ്. ഓരോ ദിവസവും തീയേറ്ററുകളിൽ തിരക്കേറി വരികയാണ് ഈ ചിത്രത്തിന് എന്നു പറയാം. ഇപ്പോഴിതാ ഈ ചിത്രത്തിൽ കരിനീല കണ്ണുള്ള പെണ്ണേ എന്ന ഗാനത്തിന്റെ വീഡിയോ അണിയറ പ്രവർത്തകർ പുറത്തു വിട്ടിരിക്കുകയാണ്. ഇന്നലെ പുറത്ത് വന്ന ഈ ഗാനം വലിയ പ്രേക്ഷക ശ്രദ്ധയാണ് നേടിയെടുക്കുന്നത്. രഞ്ജിൻ രാജ് ഈണം നൽകിയ ഈ ഗാനം ആലപിച്ചിരിക്കുന്നത് കാർത്തിക്, അഖില ആനന്ദ് എന്നിവരും രചിച്ചിരിക്കുന്നത് ബി കെ ഹരിനാരായണനും ആണ്.

ഷാഹി കബീർ രചന നിർവഹിച്ചിരിക്കുന്ന ഈ ചിത്രം അപ്പു പാത്തു പപ്പു പ്രൊഡക്ഷൻ ബാനറിൽ ജോജു ജോർജ് തന്നെയാണ് നിർമ്മിച്ചിരിക്കുന്നതും. ജോജു ജോർജ് അവതരിപ്പിക്കുന്ന ടൈറ്റിൽ കഥാപാത്രമായ ജോസെഫ് എന്ന റിട്ടയേർഡ് പോലീസ് ഓഫീസറുടെ കഥയാണ് ഈ ചിത്രം നമ്മളോട് പറയുന്നത്. ഈ കഥാപാത്രം ആയി ജോജു ജോർജ് നൽകിയത് വളരെ വിശ്വസനീയമായതും സ്വാഭാവികമായതുമായ പ്രകടനമാണ്. അദ്ദേഹത്തിന്റെ കരിയർ ബെസ്റ്റ് എന്നു നമ്മുക്കു ജോസഫിനെ വിശേഷിപ്പിക്കാം. മറ്റു കഥാപാത്രങ്ങളെ അവതരിപ്പിച്ച, ദിലീഷ് പോത്തൻ, ആത്മീയ, മാധുരി, മാളവിക, സുധി കോപ്പ, ജെയിംസ്, ജാഫർ ഇടുക്കി, ഇർഷാദ്, ഇടവേള ബാബു, അനിൽ മുരളി, ടിറ്റോ, ജോണി ആന്റണി, നെടുമുടി വേണു എന്നിവരും മികച്ച പ്രകടനം കാഴ്ച വെച്ചു. മനേഷ് മാധവൻ എന്ന ഛായാഗ്രാഹകൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തത് കിരൺ ദാസ് ആണ്.