മോഹൻലാൽ ലോഞ്ച് ചെയ്‌ത സുരാജ് ആലപിച്ച കുട്ടൻപിള്ളയുടെ ശിവരാത്രിയിലെ ഗാനം എത്തി..!

കഴിഞ്ഞ ദിവസമാണ് കമ്പ്ലീറ്റ് ആക്ടർ മോഹൻലാൽ ഒരു ഗാനം ലോഞ്ച് ചെയ്തത്. സുരാജ് വെഞ്ഞാറമ്മൂട് കുട്ടൻപിള്ളയുടെ ശിവരാത്രി എന്ന ചിത്രത്തിന് വേണ്ടി ആലപിച്ച ഗാനം ആയിരുന്നു അത്. എന്റെ ശിവനെ എന്ന് തുടങ്ങുന്ന ആ ഗാനം ഇപ്പോൾ ഒഫീഷ്യൽ ആയി റിലീസ് ചെയ്തു കഴിഞ്ഞു. ജീൻ മാർക്കോസ് സംവിധാനം ചെയ്ത ഈ ചിത്രത്തിലെ ഗാനങ്ങൾക്ക് ഈണം പകർന്നത് പ്രശസ്ത ഗായികയായ സയനോര ഫിലിപ്പ് ആണ്. ഈ ചിത്രത്തിലെ ഒരു ചക്ക പാട്ടു ആദ്യം റിലീസ് ചെയ്യുകയും മികച്ച പ്രേക്ഷകാഭിപ്രായം നേടുകയും ചെയ്തിരുന്നു. ഇപ്പോഴിതാ സുരാജ് ആലപിച്ച ഈ പുതിയ ഗാനവും വമ്പൻ സ്വീകരണം ആണ് നേടുന്നത്. കഴിഞ്ഞ ദിവസം പാട്ടു കേട്ട മോഹൻലാൽ തനിക്കീ ഗാനം വളരെയധികം ഇഷ്ട്ടപെട്ടു എന്ന് സുരാജ് വെഞ്ഞാറമ്മൂടിനെയും സംഗീത സംവിധായിക സയനോര ഫിലിപ്പിനെയും നേരിട്ട് അറിയിച്ചിരുന്നു.

ഇന്ദ്രജിത്തിനെ നായകനാക്കി എയ്‌ഞ്ചൽസ് എന്ന ചിത്രമൊരുക്കിയ, ജീൻ മാർക്കോസ് സംവിധാനം ചെയ്തിരിക്കുന്ന രണ്ടാമത്തെ ചിത്രമായ കുട്ടൻപിള്ളയുടെ ശിവരാത്രിക്ക് തിരക്കഥ ഒരുക്കിയത് ജോസെലെറ്റ്‌ ജോസഫ് ആണ് .കുട്ടൻ പിള്ള എന്ന മധ്യവയസ്‌കൻ ആയാണ് സുരാജ് ഈ ചിത്രത്തിൽ അഭിനയിക്കുന്നത്. ഒരു പോലീസ് കോൺസ്റ്റബിൾ ആണ് കുട്ടൻ പിള്ള. ആലങ്ങാട് പ്രൊഡക്ഷൻസിന്റെ ബാനറിൽ രാജി നന്ദകുമാർ നിർമ്മിച്ചിരിക്കുന്ന ഈ ചിത്രത്തിൽ ബിജു സോപാനം, മിഥുൻ രമേശ്, ശ്രിന്ദ എന്നിവരും സുരാജിനൊപ്പം അഭിനയിക്കുന്നുണ്ട്. ഷിബിഷ് കെ ചന്ദ്രൻ ചിത്ര സംയോജനം നിർവഹിച്ച ഈ ചിത്രത്തിന് ദൃശ്യങ്ങൾ നൽകിയത് ഫാസിൽ നാസർ ആണ്. അധികം വൈകാതെ തീയേറ്ററുകളിൽ എത്തുന്ന ഈ ചിത്രം ഇപ്പോൾ പ്രേക്ഷകരുടെ മികച്ച ശ്രദ്ധയാണ് നേടിയെടുക്കുന്നത്.