ഷാൻ റഹ്മാൻ- വിനീത് ശ്രീനിവാസൻ ടീം വീണ്ടും; അരവിന്ദന്റെ അതിഥികളിലെ ആദ്യ ഗാനം സോഷ്യൽ മീഡിയയിൽ ശ്രദ്ധ നേടുന്നു…

വീണ്ടും ഒരു മനോഹര ഗാനവുമായി പ്രേക്ഷകരുടെ ഹൃദയം കീഴടക്കാൻ എത്തിയിരിക്കുകയാണ് ഷാൻ റഹ്മാനും വിനീത് ശ്രീനിവാസനും. എം മോഹനൻ സംവിധാനം ചെയ്ത അരവിന്ദന്റെ അതിഥികൾ എന്ന ചിത്രത്തിന് വേണ്ടി ഷാൻ റഹ്മാൻ ഈണമിട്ടു വിനീത് ശ്രീനിവാസൻ ആലപിച്ച കണ്ണേ തായ് മലരേ എന്ന ഗാനമാണ് ഇന്നലെ റിലീസ് ചെയ്തത്. ബി കെ ഹരിനാരായണൻ വരികൾ എഴുതിയ ഈ ഗാനം മനോഹരമായ ഒരു മെലഡിയാണ്. വിനീത് ശ്രീനിവാസന്റെ മാന്ത്രിക ശബ്ദത്തിൽ ഈ ഗാനം ഇപ്പോൾ തന്നെ പ്രേക്ഷകരെ ആകർഷിച്ചു കഴിഞ്ഞു. പതിയറ എന്റെർറ്റൈന്മെന്റിന്റെ ബാനറിൽ പ്രദീപ് കുമാർ ആണ് ഈ ചിത്രം നിർമ്മിച്ചിരിക്കുന്നത്. ശ്രീനിവാസൻ, വിനീത് ശ്രീനിവാസൻ, അജു വർഗീസ്, നിഖില വിമൽ, സലിം കുമാർ, ഉർവശി, ശാന്തി കൃഷ്ണ, കെ പി എ സി ലളിത എന്നിവരും ഈ ചിത്രത്തിന്റെ താര നിരയുടെ ഭാഗം ആണ്.

രാജേഷ് രാഘവൻ തിരക്കഥ രചിച്ചിരിക്കുന്നു ഈ ചിത്രത്തിന് ദൃശ്യങ്ങൾ നൽകിയത് സ്വരൂപ് ഫിലിപ്പും, എഡിറ്റിംഗ് നിർവഹിച്ചിരിക്കുന്നത് പരിചയ സമ്പന്നനായ രഞ്ജൻ അബ്രഹാമും ആണ്. ബിഗ് ബാംഗ് എന്റർടൈൻമെൻറ്സിന്റെ ബാനറിൽ നോബിൾ ബാബു തോമസും ഈ ചിത്രത്തിന്റെ നിർമ്മാണ പങ്കാളി ആണ്. മ്യൂസിക് 24 x 7 ആണ് ഈ ചിത്രത്തിന്റെ മ്യൂസിക് പാർട്ണർ. അരവിന്ദന്റെ അതിഥികൾ എം മോഹനന്റെ അഞ്ചാമത്തെ ചിത്രമാണ് . കഥപറയുമ്പോൾ എന്ന സൂപ്പർ ഹിറ്റ് ഒരുക്കി അരങ്ങേറിയ അദ്ദേഹം പിന്നീട് മാണിക്യക്കല്ല്, 916 , മൈ ഗോഡ് എന്നീ ചിത്രങ്ങളും ഒരുക്കി. ശ്രീനിവാസൻ- വിനീത് ശ്രീനിവാസൻ ടീം വീണ്ടും ഒന്നിക്കുന്നു എന്നതും, അതുപോലെ എബി എന്ന ചിത്രത്തിന് ശേഷം വിനീത് ശ്രീനിവാസൻ- അജു വർഗീസ് ടീം ഒന്നിക്കുന്നു എന്നതും ഈ ചിത്രത്തിന്റെ പ്രത്യേകത ആണ്. അരവിന്ദന്റെ അതിഥികളുടെ ഫസ്റ്റ് പോസ്റ്റർ ഏറെ ശ്രദ്ധ നേടിയിരുന്നു.