ശ്രദ്ധ നേടി വട്ടമേശ സമ്മേളനം സ്നീക് പീക് വീഡിയോസ്; നരസിംഹത്തിനും ഒടിയനും ട്രോൾ..!

പ്രശസ്ത നടനും സംവിധായകനുമായ വിപിൻ ആറ്റ്ലിയുടെ നേതൃത്വത്തിൽ ആറു സംവിധായകർ ചേർന്ന് ഒരുക്കിയ അഞ്ചു ചിത്രങ്ങൾ ചേർത്തൊരുക്കിയ ആന്തോളജി ചിത്രമായ വട്ടമേശ സമ്മേളനം മികച്ച അഭിപ്രായം ആണ് നേടിയെടുക്കുന്നത്. പാഷാണം ഷാജി സംവിധാനം ചെയ്ത കറിവേപ്പില, വിപിൻ ആറ്റ്ലി തിരക്കഥ ഒരുക്കി സംവിധാനം ചെയ്ത പർർ, വിജീഷ് എ സി തിരക്കഥ ഒരുക്കി സംവിധാനം ചെയ്ത സൂപ്പർ ഹീറോ, സാഗർ അയ്യപ്പൻ ഒരുക്കിയ ദൈവം നമ്മുടെ കൂടെ, നൗഫൽ നൗഷാദ്, അമരേന്ദ്രൻ ബൈജു എന്നിവർ ചേർന്ന് സംവിധാനം ചെയ്ത മാനിയാക് എന്നിവയാണ് ഈ ആന്തോളജി ചിത്രത്തിൽ ഉൾപ്പെടുത്തിയ അഞ്ചു ചിത്രങ്ങൾ. ഒരു സ്പൂഫ്, ആക്ഷേപ ഹാസ്യം മോഡലിൽ ആണ് ഇതിലെ ചിത്രങ്ങൾ ഒരുക്കിയിരിക്കുന്നത്.

ഇപ്പോഴിതാ വട്ടമേശ സമ്മേളനം ടീം പുറത്തു വിട്ട സ്നീക് പീക് വീഡിയോസ് സോഷ്യൽ മീഡിയയുടെ വലിയ ശ്രദ്ധയാണ് നേടുന്നത്. മോഹൻലാൽ- ഷാജി കൈലാസ് ചിത്രമായ നരസിംഹം, മോഹൻലാൽ- ശ്രീകുമാർ മേനോൻ ചിത്രമായ ഒടിയൻ എന്നിവയെ ഒക്കെ വളരെ രസകരമായി ട്രോൾ ചെയ്തു കൊണ്ടുള്ള സീനുകൾ ആണ് പുറത്തു വിട്ടിരിക്കുന്നത്. ഇത് കൂടാതെ സിനിമയിൽ പരസ്യം തിരുകുന്ന പരിപാടികളെയും ഈ സീനുകളിൽ ട്രോളുന്നുണ്ട്. സിനിമാ സംഘടനകളേയും അതിൽ നടക്കുന്ന രസകരമായ കാര്യങ്ങളെയും ഇപ്പോൾ പുലർത്തു വിട്ട വീഡിയോകളിൽ കൂടി രസകരമായി തന്നെ കളിയാക്കി വിടുന്നുണ്ട്.

എം സി സി സിനിമാ കമ്പനിയുടെ ബാനറിൽ അമരേന്ദ്രൻ ബൈജു നിർമ്മിച്ചിരിക്കുന്ന ഈ ചിത്രത്തിൽ മേജർ രവി, വിപിൻ ആറ്റ്ലി, പാഷാണം ഷാജി, ജിബു ജേക്കബ്, ജൂഡ് ആന്റണി ജോസഫ്, നോബി, സോഹൻ സീനുലാൽ, ജിസ് ജോയ്, കലിംഗ ശശി, സുധി കോപ്പ, ആദിഷ് പ്രവീൺ, ഗോകുൽ, അമരേന്ദ്രൻ ബൈജു, മറീന മൈക്കൽ, അഞ്ജലി നായർ അക്ഷതിത, ദീപ എസ്തർ, ശ്രീജ, സരിത, സൗമ്യ തുടങ്ങി ഒട്ടേറെ പ്രമുഖ താരങ്ങളും പുതുമുഖങ്ങളും അഭിനയിച്ചിട്ടുണ്ട്.