കുട്ടി സ്റ്റോറിക്ക് ശേഷം ആരാധരെ ആവേശത്തിലാഴ്ത്താൻ ദളപതിയുടെ മാസ്റ്ററിലെ പുതിയ ഗാനം എത്തി

ദളപതി വിജയ് നായകനായ മാസ്റ്റർ എന്ന ചിത്രത്തിലെ ആദ്യ ഗാനം റിലീസ് ചെയ്തത് കഴിഞ്ഞ മാസമാണ്. അനിരുദ്ധ് രവിചന്ദർ ഈണം പകർന്ന ലെറ്റ് മി സിങ് എ കുട്ടി സ്റ്റോറി എന്ന് തുടങ്ങുന്ന ആ ഗാനമാലപിച്ചതും ദളപതി വിജയ് ആയിരുന്നു. സോഷ്യൽ മീഡിയ മുഴുവൻ തരംഗമായി മാറിയ ആ ഗാനം ലോകം മുഴുവനുമെത്തി. ഇപ്പോഴിതാ ഈ ചിത്രത്തിലെ വാത്തി കമിങ് എന്ന് തുടങ്ങുന്ന രണ്ടാമത്തെ ഗാനവും ഇന്ന് റിലീസ് ചെയ്തിരിക്കുകയാണ്. കുട്ടി സ്റ്റോറി എന്ന ഗാനത്തിന്റെ ലിറിക് വീഡിയോക്ക് ഇതുവരെ ലഭിച്ചത് മുപ്പതു മില്യൺ യൂട്യൂബ് കാഴ്ചക്കാരെയാണ്. ഈ പുതിയ ഗാനവും ആ ലെവലിൽ ഹിറ്റാകുമെന്നാണ് വിജയ് ആരാധകരും സിനിമാ പ്രേമികളുമഭിപ്രായപ്പെടുന്നത്. ഈ വരുന്ന മാർച്ച് 15 ഞായറാഴ്ചയാണ് മാസ്റ്ററിന്റെ ഓഡിയോ ലോഞ്ച് നടക്കാൻ പോകുന്നത്.

മാനഗരം എന്ന സൂപ്പർ ഹിറ്റിനും, കാർത്തിയെ നായകനാക്കിയൊരുക്കിയ കൈദി എന്ന ബ്ലോക്ക്ബസ്റ്റർ ചിത്രത്തിനും ശേഷം ലോകേഷ് കനകരാജ് സംവിധാനം ചെയ്ത ചിത്രമാണ് മാസ്റ്റർ. അടുത്ത മാസം ഒൻപതിനാണ് ഈ ചിത്രം ലോകം മുഴുവൻ റിലീസ് ചെയ്യുമെന്ന് പ്രഖ്യാപിച്ചിരിക്കുന്നത്. എക്സ് ബി ക്രിയേറ്റേഴ്സ് എന്ന ബാനറിൽ സേവ്യർ ബ്രിട്ടോ നിർമ്മിച്ചിരിക്കുന്ന ഈ ചിത്രത്തിന്റെ രചന നിർവഹിച്ചിരിക്കുന്നത് ലോകേഷ് കനകരാജ്, രത്‌നകുമാർ എന്നിവർ ചേർന്നാണ്. ദളപതി വിജയ്ക്ക് ഒപ്പം മക്കൾ സെൽവൻ വിജയ് സേതുപതിയും പ്രധാന വേഷം ചെയ്യുന്ന ഈ ചിത്രത്തിൽ ശന്തനു ഭാഗ്യരാജ്, മാളവിക മോഹനൻ, ഗൗരി കിഷൻ, അർജുൻ ദാസ്, ആൻഡ്രിയ, ശ്രീമാൻ, പ്രേം, സഞ്ജീവ്, ശ്രീനാഥ്, രമ്യ സുബ്രമണ്യൻ, രമേശ് തിലക് എന്നിവരുമഭിനയിക്കുന്നു.