ഫെജോയുടെ റാപ്പുമായി ഉല്ലാസത്തിലെ പുത്തൻ ഗാനമെത്തി; വീഡിയോ കാണാം

പ്രശസ്ത യുവ താരം ഷെയിൻ നിഗം നായകനായി എത്തുന്ന ഏറ്റവും പുതിയ ചിത്രമാണ് ഉല്ലാസം. ജൂലൈ ഒന്നിന് റിലീസ് ചെയ്യാൻ പോകുന്ന ഈ ചിത്രം വലിയ പ്രതീക്ഷകളോടെയാണ് പ്രേക്ഷകർ കാത്തിരിക്കുന്നത്. ഇതിന്റെ ടീസർ, ട്രൈലെർ രണ്ടു ഗാനങ്ങളെന്നിവ മികച്ച പ്രേക്ഷക ശ്രദ്ധയാണ് നേടിയെടുത്തത്. ഇപ്പോഴിതാ ഉല്ലാസത്തിലെ പുതിയ ഗാനത്തിന്റെ ലിറിക്കൽ വീഡിയോ റിലീസ് ചെയ്തിരിക്കുകയാണ്. ഉല്ലാസമോ എന്ന വരികളോടെ തുടങ്ങുന്ന ഈ റാപ് സോങ് രചിക്കുകയും ആലപിക്കുകയും ചെയ്തിരിക്കുന്നത് പ്രശസ്ത മലയാളം റാപ്പറായ ഫെജോവാണ്. ഷാൻ റഹ്മാനാണ് ഈ ഗാനത്തിന് ഈണം പകർന്നിരിക്കുന്നത്. യുവത്വത്തിന്റെ ആവേശം തുളുമ്പുന്ന വരികളും സംഗീതവും ആലാപന ശൈലിയുമാണ് ഈ ഗാനത്തെ ആകര്ഷകമാക്കുന്നത്‌ എന്നാണ് പ്രേക്ഷകർ അഭിപ്രായപ്പെടുന്നത്. ഷെയിൻ നിഗമിന്റെ കരിയറിലെ തന്നെ ആദ്യത്തെ കമ്പ്ലീറ്റ് ഫൺ റൊമാന്റിക് എന്റർടൈനറായിരിക്കും ഉല്ലാസം എന്ന് പറയാം.

പ്രണയവും ആക്ഷനും വൈകാരിക നിമിഷങ്ങളും കോമെഡിയുമെല്ലാം ഉൾപ്പെടുത്തി ഒരുക്കിയിരിക്കുന്ന ഈ ചിത്രം, നവാഗതനായ ജീവൻ ജോജോയാണ് സംവിധാനം ചെയ്തിരിക്കുന്നത്. ജോ കൈതമറ്റം, ക്രിസ്റ്റി കൈതമറ്റം എന്നിവർ ചേർന്ന് നിർമ്മിച്ച ഈ ചിത്രം രചിച്ചത് പ്രവീൺ ബാലകൃഷ്ണനാണ്. രഞ്ജി പണിക്കർ, ദീപക് പരമ്പൊൾ, ബേസിൽ ജോസെഫ്, അജു വർഗീസ് എന്നിവരും പ്രധാന വേഷങ്ങൾ ചെയ്യുന്ന ഈ ഈ ചിത്രത്തിലെ നായികാ വേഷം ചെയ്തിരിക്കുന്നത് പവിത്ര ലക്ഷ്മിയാണ്. ഈ ചിത്രത്തിന് ക്യാമറ ചലിപ്പിച്ചത് സ്വരൂപ് ഫിലിപ്പും, എഡിറ്റ് ചെയ്തത് ജോൺ കുട്ടിയും, ഇതിനു പശ്‌ചാത്തല സംഗീതമൊരുക്കിയത് ഗോപി സുന്ദറുമാണ്. കംപ്ലീറ്റ് ആക്ടർ മോഹൻലാൽ, മെഗാ സ്റ്റാർ മമ്മൂട്ടി എന്നിവരാണ് ഇതിന്റെ പോസ്റ്റർ, ട്രൈലെർ എന്നിവയെല്ലാം പുറത്തു വിട്ടത്.