ഇതിൽ ഒന്നുമില്ല; മുകേഷിന്റെ മറുപടി കേട്ടമ്പരന്നു രമേഷ് പിഷാരടി; തരംഗമായി സുനാമിയുടെ രണ്ടാം ടീസർ..!

നടനും സംവിധായകനുമായ ലാലും അദ്ദേഹത്തിന്റെ മകനായ ജീൻ പോൾ ലാലും ഒരുമിച്ചു സംവിധാനം ചെയ്ത ചിത്രമാണ് അടുത്ത മാസം റിലീസ് ചെയ്യാൻ പോകുന്ന സുനാമി. പാണ്ട ഡാഡ് പ്രൊഡക്ഷൻസിന്റെ ബാനറിൽ അലൻ ആന്റണി നിർമ്മിക്കുന്ന ഈ കോമഡി ഫാമിലി എന്റെർറ്റൈനെർ ചിത്രത്തിന്റെ ടീസറുകൾ ആണ് ഇപ്പോൾ സോഷ്യൽ മീഡിയയിൽ തരംഗമായി മാറുന്നത്. നടൻ ദിലീപും ഇന്നസെന്റും തമ്മിലുള്ള ഒരു സംഭാഷണം പോലെയാണ് ആദ്യ ടീസർ പുറത്തു വന്നതെങ്കിൽ, ഇതിന്റെ രണ്ടാം ടീസറിൽ നമ്മൾ കേൾക്കുന്നത് ഈ ചിത്രത്തെക്കുറിച്ചു സംസാരിക്കുന്ന മുകേഷ്, രമേശ് പിഷാരടി എന്നിവരുടെ ശബ്ദമാണ്. ഈ ചിത്രത്തെക്കുറിച്ചു രമേശ് പിഷാരടി മുകേഷിനോട് ടെലിഫോൺ കോളിലൂടെ ചോദിക്കുന്നതും അതിനു മുകേഷ് നൽകുന്ന രസകരമായ മറുപടിയുമാണ് രണ്ടാം ടീസറിനെ സൂപ്പർ ഹിറ്റാക്കുന്നത്. ഇതിലെ ഒരു ഗാനവും ഇതിനോടകം വലിയ ശ്രദ്ധ നേടിക്കഴിഞ്ഞു.

അടുത്ത മാസം രണ്ടാം വാരത്തോടെ റിലീസ് ചെയ്യുമെന്ന് പ്രതീക്ഷിക്കപ്പെടുന്ന ഈ ചിത്രത്തിൽ വലിയ താരനിരയാണ് അണിനിരക്കുന്നത്. ലാൽ തന്നെ കഥയും തിരക്കഥയും ഒരുക്കിയിരിക്കുന്ന ഈ ചിത്രത്തിന് അലക്‌സ് ജെ പുളിക്കൽ ഛായാഗ്രഹണവും രതീഷ് രാജ് എഡിറ്റിംഗും നിർവഹിച്ചിരിക്കുന്നു. യക്സൻ ഗാരി പെരേരയും നേഹ എസ് നായരും ചേർന്നാണ് ഈ ചിത്രത്തിന് വേണ്ടി സംഗീതമൊരുക്കിയിരിക്കുന്നതു. ഇന്നസെന്റ്, മുകേഷ്, അജു വർഗീസ്, ബാലു വർഗീസ്, സുരേഷ് കൃഷ്ണ, ബിനു അടിമാലി, ആരാധ്യ ആൻ, അരുൺ ചെറുകാവിൽ, ദേവി അജിത്, നിഷ മാത്യു, വത്സല മേനോൻ, സിനോജ് വർഗീസ്, സ്മിനു എന്നിങ്ങനെ ഒട്ടേറെ പ്രശസ്ത കലാകാരൻമാർ ഈ ചിത്രത്തിൽ അഭിനയിച്ചിരിക്കുന്നു. ചിരിയും കുസൃതികളും നിറഞ്ഞ ഒരു കമ്പ്ലീറ്റ് ഫൺ ഫിലിം ആയാണ് സുനാമി ഒരുക്കിയിരിക്കുന്നത് എന്നാണ് അണിയറ പ്രവർത്തകർ അറിയിച്ചിരിക്കുന്നത്.