സൂപ്പർ ത്രില്ലറാവാൻ വീണ്ടുമൊരു ടോവിനോ ചിത്രം; അന്വേഷിപ്പിൻ കണ്ടെത്തും ട്രൈലെർ കാണാം

യുവതാരം ടോവിനോ തോമസ് നായകനായി എത്തുന്ന ഏറ്റവും പുതിയ ചിത്രമായ അന്വേഷിപ്പിൻ കണ്ടെത്തുമിന്റെ ട്രൈലെർ പുറത്ത്. ആദ്യാവസാനം പ്രേക്ഷകരെ ആകാംഷയുടെ മുൾമുനയിൽ നിർത്തുന്ന ഒരു ഗംഭീര ഇൻവെസ്റ്റിഗേഷൻ ത്രില്ലറായിരിക്കും ഈ ചിത്രമെന്ന സൂചനയാണ് ഇതിന്റെ ട്രൈലെർ നമ്മുക്ക് തരുന്നത്. പോലീസ് കഥാപാത്രമായി ടോവിനോ തോമസ് എത്തുന്ന ഈ ബിഗ് ബഡ്ജറ്റ് ചിത്രം രണ്ട് കാലഘട്ടങ്ങളിലൂടെയാണ് സഞ്ചരിക്കുന്നതെന്ന സൂചനയും ഇതിന്റെ ആദ്യം വന്ന ടീസറും ഇപ്പോൾ വന്നിരിക്കുന്ന ട്രെയ്ലറും നൽകുന്നുണ്ട്. നവാഗതനായ ഡാർവിൻ കുര്യാക്കോസ് സംവിധാനം ചെയ്തിരിക്കുന്ന ഈ ഇൻവെസ്റ്റിഗേഷൻ ഫെബ്രുവരി ഒൻപതിന് ആണ് പ്രേക്ഷകരുടെ മുന്നിലെത്തുക. സിദ്ദിഖ്, ഇന്ദ്രൻസ്, ബാബുരാജ്, ഹരിശ്രീ അശോകൻ, ഷമ്മി തിലകൻ, പ്രമോദ് വെളിയനാട്, വിനീത് തട്ടിൽ, രാഹുൽ രാജഗോപാൽ, നൻപകൽ നേരത്ത് മയക്കത്തിലൂടെ ശ്രദ്ധേയയായ രമ്യ സുവി എന്നിവരും വേഷമിട്ടിരിക്കുന്ന ഈ ചിത്രം, തീയേറ്റർ ഓഫ് ഡ്രീംസിന്റെ ബാനറിൽ ഡോൾവിൻ കുര്യാക്കോസ്, ജിനു വി എബ്രഹാം എന്നിവർ ചേർന്നാണ് നിർമ്മിച്ചിരിക്കുന്നത്.

പ്രശസ്ത തിരക്കഥാകൃത്തും സംവിധായകനുമായ ജിനു എബ്രഹാമാണ് ഈ ചിത്രം രചിച്ചിരിക്കുന്നത്. ഗൗതം ശങ്കർ കാമറ ചലിപ്പിച്ച ഈ ചിത്രത്തിന് സംഗീതവും പശ്‌ചാത്തല സംഗീതവും ഒരുക്കിയത് പ്രശസ്ത തെന്നിന്ത്യൻ സംഗീത സംവിധായകനായ സന്തോഷ് നാരായണനാണ്. ഈ ചിത്രത്തിൽ രണ്ട് നായികമാരാണുള്ളത്. ആ രണ്ട് പേരും പുതുമുഖങ്ങളാണ് എന്ന പ്രത്യേകതയുമുണ്ട്. സൈജു ശ്രീധർ എഡിറ്റ് ചെയ്തിരിക്കുന്ന ഈ ചിത്രത്തിന്റെ നിർമ്മാണ പങ്കാളികളായി വിക്രം മെഹ്‍റ, സിദ്ധാർഥ് ആനന്ദ് കുമാർ എന്നിവരും ഇതിന്റെ ഭാഗമായിട്ടുണ്ട്. ആനന്ദ് നാരായണൻ എന്നാണ് ഈ ചിത്രത്തിൽ ടോവിനോ തോമസ് അവതരിപ്പിക്കുന്ന സബ് ഇൻസ്‌പെക്ടർ കഥാപാത്രത്തിന്റെ പേര്