നിവിൻ പോളിയുടെ കട്ടകലിപ്പ് രംഗങ്ങളുമായി ‘റിച്ചി’യുടെ ട്രെയിലര്‍ പുറത്തിറങ്ങി

നിവിന്‍ പോളിയെ നായകനാക്കി ഗൗതം രാമചന്ദ്രന്‍ സംവിധാനം ചെയ്യുന്ന തമിഴ്‌ചിത്രം റിച്ചിയുടെ ട്രെയിലർ പുറത്തിറങ്ങി. ഗൗതമിന്റെ തന്നെ കന്നട ചിത്രമായ ‘ഉള്ളിടവരു കണ്ടന്തേ’യുടെ റീമേക്ക് ആയ ‘റിച്ചി’യിൽ ഒരു ലോക്കൽ റൗഡിയുടെ വേഷത്തിലാണ് നിവിൻ എത്തുന്നത്. നിവിൻ പോളിയുടെ മാസ് ഗെറ്റപ്പ് തന്നെയാണ് ട്രെയിലറിന്റെ പ്രധാന ആകർഷണം. ചിത്രത്തിന്റെ ഫസ്റ്റ്ലുക്ക് പോസ്റ്ററും ടീസറും നേരത്തെ തന്നെ ആളുകളുടെ ശ്രദ്ധപിടിച്ചുപറ്റിയിരുന്നു. നിവിനും തമിഴ്താരം നാട്ടിയുമാണ് ചിത്രത്തിലെ പ്രധാന കഥാപാത്രങ്ങള്‍. നിവിന്‍ അവതരിപ്പിക്കുന്ന കഥാപാത്രത്തിന്റെ വളര്‍ത്തച്ഛനായി പ്രകാശ് രാജും എത്തുന്നുണ്ട്. ശ്രദ്ധ ശ്രീനാഥ് നായികയാകുന്ന ചിത്രത്തില്‍ നാട്ടി, ലക്ഷ്മി പ്രിയ ചന്ദ്രമൗലി എന്നിവരാണ് മറ്റ് പ്രധാനകഥാപാത്രങ്ങളെ അവതരിപ്പിക്കുന്നത്.

നേരം, പ്രേമം എന്നീ ചിത്രങ്ങൾ നിവിൻ പോളിക്ക് തമിഴ്നാട്ടിൽ നിരവധി ആരാധകരെ സമ്മാനിച്ചിട്ടുണ്ട്. അതുകൊണ്ടുതന്നെ റിച്ചിക്കായുള്ള കാത്തിരിപ്പിലാണ് ആരാധകർ. ഡിസംബർ 8 നാണ് ചിത്രം തിയറ്ററുകളിൽ എത്തുന്നത്. യെസ് സിനിമ കമ്പനിയുടെ ബാനറില്‍ വിനോദ് ഷൊര്‍ണൂര്‍, ആനന്ദ് പയ്യന്നൂര്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.