സിനിമാ നിരൂപകർ ശ്രദ്ധിക്കുക; ഒരു കൊലയാളി കാത്തിരിപ്പുണ്ട്; ദുൽഖർ സൽമാൻറെ ബോളിവുഡ് ചിത്രം ട്രൈലെർ കാണാം

മലയാളത്തിന്റെ യുവ താരം ദുൽഖർ നായകനായി എത്തുന്ന മൂന്നാമത്തെ ഹിന്ദി ചിത്രമാണ് ചുപ്. കാർവാൻ, സോയ ഫാക്ടർ എന്നീ ചിത്രങ്ങൾക്ക് ശേഷം ദുൽഖർ അഭിനയിച്ച ഈ ബോളിവുഡ് ചിത്രം ഈ വരുന്ന സെപ്റ്റംബർ ഇരുപത്തി മൂന്നിനാണ് റിലീസ് ചെയ്യാൻ പോകുന്നത്. ഇപ്പോഴിതാ ഈ ചിത്രത്തിന്റെ ട്രൈലെർ റിലീസ് ചെയ്തിരിക്കുകയാണ്. സിനിമ നിരൂപകരെ തിരഞ്ഞു പിടിച്ചു വകവരുത്തുന്ന ഒരു സീരിയൽ കില്ലറും അയാളെ അന്വേഷിച്ചു പോകുന്ന ഒരു പോലീസ് ഓഫീസറുടെയും കഥയാണ് ഈ ചിത്രം പറയുന്നതെന്ന സൂചനയാണ് ഇതിന്റെ ട്രൈലെർ നൽകുന്നത്. ഒരു പക്കാ ക്രൈം ഇൻവെസ്റ്റിഗേഷൻ ത്രില്ലറായാണ് ഈ ചിത്രം ഒരുക്കിയിരിക്കുന്നതെന്നും ട്രൈലെർ നമ്മളോട് പറയുന്നു. റിവഞ്ച് ഓഫ് ആൻ ആർട്ടിസ്റ്റ് എന്നാണ് ഈ ചിത്രത്തിന്റെ ടൈറ്റിലിന് നൽകിയിരിക്കുന്ന ടാഗ് ലൈൻ.

ഈ ബോളിവുഡ് ചിത്രം സംവിധാനം ചെയ്തിരിക്കുന്നത് പ്രശസ്ത സംവിധായകനായ ആർ ബാൽകി ആണ്. ബോളിവുഡ് താരം സണ്ണി ഡിയോൾ ആണ് ഈ ചിത്രത്തിൽ ദുൽകർ സൽമാനൊപ്പം പ്രധാന വേഷം ചെയ്യുന്നത്. ഇവർക്കൊപ്പം ശ്രേയ ധന്വന്തരി, പൂജ ഭട്ട് എന്നിവരും നിർണ്ണായക വേഷങ്ങൾ ചെയ്യുന്ന ഈ ചിത്രത്തിൽ ബാൽകിയുടെ ചിത്രങ്ങളിൽ സ്ഥിരം സാന്നിധ്യമായ അമിതാബ് ബച്ചൻ അതിഥി വേഷത്തിലും ഉണ്ടാകുമെന്നു വാർത്തകൾ വന്നിരുന്നു. സംവിധായകൻ തന്നെ തിരക്കഥ രചിച്ച ഈ ചിത്രത്തിന് ക്യാമറ ചലിപ്പിച്ചത് വിശാൽ സിൻഹയും ഇതിനു സംഗീതമൊരുക്കിയത് എസ് ഡി ബർമൻ, അമിത് ത്രിവേദി, സ്നേഹ ഖൽവൽക്കർ, അമാൻ പന്ത് എന്നിവരുമാണ്. നയൻ എച് കെ ഭദ്ര എഡിറ്റ് ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് ഹോപ്പ് പ്രൊഡക്ഷന്സും പെൻ സ്റ്റുഡിയോസും ചേർന്നാണ്.