കൊമ്പ് കോർത്ത് ഷെയ്ൻ നിഗമും സണ്ണി വെയ്‌നും; പ്രതീക്ഷ വർധിപ്പിച്ച് വേല പ്രീ റിലീസ് ടീസർ

നവാഗതനായ ശ്യാം ശശി സംവിധാനം ചെയ്ത വേല എന്ന ക്രൈം ത്രില്ലർ ചിത്രം നവംബർ പത്തിന് റിലീസിനൊരുങ്ങുന്നു. എം സജാസ് രചന നിർവഹിച്ച ഈ ചിത്രത്തിൽ പ്രശസ്ത യുവതാരങ്ങളായ ഷെയ്ൻ നിഗം, സണ്ണി വെയ്ൻ എന്നിവരാണ് പ്രധാന വേഷങ്ങൾ ചെയ്യുന്നത്. ഉല്ലാസ് അഗസ്റ്റിൻ എന്ന പോലീസ് ഓഫീസറായി ഷെയ്ൻ നിഗവും മല്ലികാർജ്ജുനൻ എന്ന പോലീസ് ഓഫീസറായി സണ്ണി വെയ്‌നും എത്തുന്ന ഈ ചിത്രത്തിന്റെ ടീസർ, ട്രൈലെർ, വീഡിയോ ഗാനം എന്നിവയൊക്കെ വലിയ പ്രേക്ഷക ശ്രദ്ധ നേടിയിരുന്നു. ഇപ്പോഴിതാ ഇതിന്റെ ഒരു പ്രീ റിലീസ് ടീസർ കൂടി പുറത്ത് വന്നിരിക്കുകയാണ്. സണ്ണി വെയ്ൻ- ഷെയ്ൻ നിഗം ടീം കൊമ്പ് കോർക്കുന്ന ഈ ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ വലിയ രീതിയിൽ വർധിപ്പിക്കുന്ന തരത്തിലുള്ള ഒരു പ്രീ റിലീസ് ടീസറാണ് അണിയറ പ്രവർത്തകർ പുറത്ത് വിട്ടിരിക്കുന്നത്.

ഇരുവരുടേയും ഗംഭീര പ്രകടനം വാഗ്ദാനം ചെയ്യുന്ന ഈ ചിത്രം, വമ്പൻ തീയേറ്റർ അനുഭവമായിരിക്കും സമ്മാനിക്കുകയെന്ന സൂചനയും ഈ ടീസർ തരുന്നുണ്ട്. സിദ്ധാർഥ് ഭരതൻ, അതിഥി ബാലൻ എന്നിവരും വേഷമിട്ടിരിക്കുന്ന ഈ ചിത്രം സിൻസിൽ സെല്ലുലോയ്ഡിന്റെ ബാനറിൽ എസ് ജോർജ്, ബാദുഷ പ്രൊഡക്ഷൻസ് എന്നിവർ ചേർന്നാണ് നിർമ്മിച്ചിരിക്കുന്നത്. സുരേഷ് രാജൻ കാമറ ചലിപ്പിച്ച ഈ ചിത്രത്തിന്റെ എഡിറ്റിംഗ് നിർവഹിച്ചത് മഹേഷ്‌ ഭുവനേന്ദ്, സംഗീതമൊരുക്കിയത് സാം സി എസ്‌ എന്നിവരാണ്. ദുൽഖർ സൽമാന്റെ വേഫേറെർ ഫിലിംസ് ആണ് ഈ ചിത്രം കേരളത്തിൽ റിലീസ് ചെയ്യാൻ പോകുന്നത്. ആർഡിഎക്സ്‌ എന്ന ബ്ലോക്ക്ബസ്റ്ററിന് ശേഷം വരുന്ന ഷെയ്ൻ നിഗം ചിത്രമെന്ന നിലയിലും വേല വലിയ പ്രതീക്ഷ പകരുന്നുണ്ട്. പോലീസ് കൺട്രോൾ റൂമിന്റെ പശ്ചാത്തലത്തിൽ കഥ പറയുന്ന ഈ ചിത്രം പാലക്കാടും പരിസര പ്രദേശത്തുമാണ് ചിത്രീകരിച്ചത്.