ഒന്നിച്ച് ചുവട് വെച്ച് രണ്ട് മെഗാ താരങ്ങൾ; ചുവടുകളൊരുക്കി പ്രഭുദേവ; ഗോഡ്ഫാദർ സോങ് ടീസർ കാണാം

ഇന്ത്യൻ സിനിമയിലെ രണ്ട് മെഗാതാരങ്ങളായ ചിരഞ്ജീവിയും സൽമാൻ ഖാനും ആദ്യമായി ഒന്നിക്കുന്ന ചിത്രമാണ് തെലുങ്ക് ചിത്രമായ ഗോഡ്ഫാദർ. മോഹൻ രാജ സംവിധാനം ചെയ്ത ഈ ചിത്രം ബ്ലോക്ക്ബസ്റ്റർ മലയാളം ചിത്രമായ ലൂസിഫറിന്റെ റീമേക്കാണ്. കംപ്ലീറ്റ് ആക്ടർ മോഹൻലാലിനെ നായകനാക്കി യുവ സൂപ്പർ താരം പൃഥ്വിരാജ് സുകുമാരൻ സംവിധാനം ചെയ്ത ഈ ലൂസിഫറിന്റെ ഈ തെലുങ്ക് റീമേക്കിൽ, മോഹൻലാൽ, പൃഥ്വിരാജ് എന്നിവർ മലയാളത്തിൽ ചെയ്ത കഥാപാത്രങ്ങളായാണ് ചിരഞ്ജീവി, സൽമാൻ ഖാൻ എന്നിവരെത്തുന്നത്. ഇതിന്റെ ടീസർ കുറച്ചു നാളുകൾക്കു മുൻപാണ് റിലീസ് ചെയ്തത്. ഇപ്പോഴിതാ ഈ ചിത്രത്തിന്റെ ഒരു ഗാനത്തിന്റെ പ്രോമോ ടീസർ കൂടി റിലീസ് ചെയ്തിരിക്കുകയാണ്. ഈ ഗാനം നാളെ റിലീസ് ചെയ്യും. താർ മാർ തക്കർ മാർ എന്ന വരികളോടെ തുടങ്ങുന്ന ഈ ഡാൻസ് നമ്പർ ആലപിച്ചിരിക്കുന്നത് ശ്രേയ ഘോഷാലും ഇതിനു വരികൾ രചിച്ചത് അനന്ത ശ്രീരാമുമാണ്. തമൻ എസ് ആണ് ഈ ചിത്രത്തിന് വേണ്ടി സംഗീതമൊരുക്കിയത്.

ചിരഞ്ജീവിയും സൽമാൻ ഖാനും ചുവട് വെക്കുന്ന ഈ ഗാനത്തിന് നൃത്ത സംവിധാനം ചെയ്തത് പ്രഭുദേവയാണ്. ഈ ചിത്രത്തിന്റെ ടീസർ പുറത്തു വന്നപ്പോൾ വലിയ വിമർശനമാണ് സോഷ്യൽ മീഡിയയിൽ നിന്നും നേരിട്ടത്‌. ഏതായാലും ഈ ഗാനം നാളെ പുറത്തു വരുമ്പോൾ എത്തരത്തിലാണ് സ്വീകരിക്കപ്പെടുക എന്നറിയാൻ കാത്തിരിക്കുകയാണ് സിനിമ പ്രേമികൾ. ലേഡി സൂപ്പർ സ്റ്റാർ നയൻ താര, പുരി ജഗന്നാഥ്, സത്യ ദേവ്, ഹാരിഷ് ഉത്തമൻ, ജയപ്രകാശ്, സച്ചിൻ കടേക്കർ, വംശി കൃഷ്ണ, നാസർ എന്നിവരും ഈ ചിത്രത്തിൽ അഭിനയിച്ചിട്ടുണ്ട്. കോണിഡാല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് ലൂസിഫറിന്റെ ഈ തെലുങ്ക് റീമേക് നിർമ്മിച്ചിരിക്കുന്നത്.