ഗംഭീര ടീസറുമായി പൃഥ്വിരാജിന്റെ ബ്രഹ്മാണ്ഡ ചിത്രം കാളിയൻ പ്രഖ്യാപിച്ചു..!

വീണ്ടുമൊരു ബ്രഹ്മാണ്ഡ ചിത്രവുമായി എത്താൻ ഒരുങ്ങുകയാണ് യുവ സൂപ്പർ താരം പൃഥ്വിരാജ് സുകുമാരൻ. കാളിയൻ എന്ന് പേരിട്ടിരിക്കുന്ന ഈ ചിത്രം സംവിധാനം ചെയ്യുന്നത് നവാഗതനായ എസ് മഹേഷ് ആണ്. മാജിക് മൂൺ പ്രൊഡക്ഷൻസിന്റെ ബാനറിൽ രാജീവ് നായർ ആണ് ഈ ചിത്രം നിർമ്മിക്കാൻ പോകുന്നത്. ഗംഭീര ടീസറുമായാണ് ഈ ചിത്രം പ്രഖ്യാപിച്ചിരിക്കുന്നത്. പൃഥ്വിരാജിന്റെ ശബ്ദത്തിലുള്ള മാസ്സ് ഡയലോഗും അതുപോലെ ഗംഭീരമായ പശ്ചാത്തല സംഗീതവും ഉൾപ്പെട്ടതാണ് ഈ ചിത്രത്തിന്റെ ടീസർ. ബ്ലെസി ഒരുക്കുന്ന ആട് ജീവിതം, പൃഥ്വിരാജ് സംവിധാനം ചെയ്യുന്ന മോഹൻലാൽ ചിത്രം ലൂസിഫർ എന്നിവ കഴിഞ്ഞതിനു ശേഷം ആയിരിക്കും ഈ ചിത്രം ആരംഭിക്കുക. കാളിയൻ എന്ന ടൈറ്റിൽ കഥാപാത്രം ആയാണ് പൃഥ്വിരാജ് അഭിനയിക്കുക. ഈ ചിത്രത്തിന്റെ കഥാപാത്രത്തിന്റെ ലുക്കും ടീസറിൽ കൂടി പുറത്തു വിട്ടിട്ടുണ്ട്.

ബി ടി അനിൽ കുമാർ രചന നിർവഹിച്ചിരിക്കുന്ന ഈ ചിത്രത്തിന് സംഗീത സംവിധാനം നിർവഹിക്കുന്നത് ബോളിവുഡിലെ പ്രശസ്തരായ സംഗീത സംവിധായക ടീം ആയ ശങ്കർ- ഇഹ്‌സാൻ – ലോയ് ആണ്. സുജിത് വാസുദേവ് ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കുക . ഇപ്പോൾ പുറത്തു വന്ന ടീസറിലെ തീം മ്യൂസിക് ഒരുക്കിയത് അനിൽ കടുവ ആണ്. അതിൽ മുഴങ്ങി കേൾക്കുന്ന ഗാനത്തിലെ വരികൾ എഴുതിയിരിക്കുന്നത് നിർമ്മാതാവായ രാജീവ് നായർ തന്നെയാണ്. ഷജിത് കോയേരി ആണ് ഈ ചിത്രത്തിന് സൗണ്ട് ഡിസൈൻ നിർവഹിക്കാൻ പോകുന്നത്. പൃഥ്വിരാജിന്റെ കരിയറിലെ എന്ന് മാത്രമല്ല മലയാള സിനിമയിലെ തന്നെ വമ്പൻ ചിത്രങ്ങളിൽ ഒന്ന് തന്നെ ആയാണ് ഈ ചിത്രം ഒരുങ്ങുക. നൂറ്റാണ്ടുകൾക്കു മുൻപ് വേണാട് ഭരിച്ചിരുന്ന ആളുകളുടെയും അന്നത്തെ യോദ്ധാക്കളുടെയും കഥയാണ് ഈ ചിത്രം പറയുന്നത്. മണ്മറഞ്ഞു പോയ, വിസ്‌മൃതിയിലാണ്ടു പോയ അങ്ങനെയൊരു യോദ്ധാവാണ് കാളിയൻ.