കിം കിം ഇനി തമിഴിൽ; തകർത്താടി മഞ്ജു വാര്യരും യോഗി ബാബുവും..!

സന്തോഷ് ശിവൻ സംവിധാനം ചെയ്ത ഏറ്റവും പുതിയ മലയാള ചിത്രമായ ജാക്ക് ആൻഡ് ജിൽ തമിഴിലുമെത്തുന്ന വിവരം ഇതിനോടകം പ്രേക്ഷകരുടെ മുന്നിലെത്തിയതാണ്. ഒരേ സമയം മലയാളത്തിലും തമിഴിലുമായൊരുക്കിയ ഈ സയൻസ് ഫിക്ഷൻ കോമഡി ചിത്രത്തിന്റെ തമിഴിലെ ടൈറ്റിൽ സെന്റിമീറ്റർ എന്നാണ്. തമിഴ് പതിപ്പിന്റെ ട്രൈലെർ ഏതാനും ദിവസങ്ങൾക്കു മുൻപ് പുറത്ത് വരികയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു. മലയാളത്തിൽ സൗബിൻ ഷാഹിർ അവതരിപ്പിക്കുന്ന കഥാപാത്രത്തിന് പകരം തമിഴിൽ ആ വേഷം ചെയ്യുന്നത് പ്രശസ്ത തമിഴ് ഹാസ്യ നടൻ യോഗി ബാബുവാണ് എന്നതാണ് പ്രധാന വ്യത്യാസം. മലയാളത്തിൽ രഞ്ജിത്ത് ടച് റിവർ എഡിറ്റ് ചെയ്ത ഈ ചിത്രത്തിന്റെ തമിഴ് വേർഷൻ എഡിറ്റ് ചെയ്തിരിക്കുന്നത് ലോറൻസ് കിഷോറാണ് എന്നതും എടുത്തു പറയേണ്ടതാണ്.

ഇപ്പോഴിതാ മലയാളത്തിൽ ഇറങ്ങി സൂപ്പർ ഹിറ്റായി മാറിയ കിം കിം എന്ന ഗാനത്തിന്റെ തമിഴ് വേർഷൻ റിലീസ് ചെയ്തിരിക്കുകയാണ്. മലയാളത്തിൽ മഞ്ജു വാര്യർ പാടിയ ഈ ഗാനം തമിഴിലും മഞ്ജു തന്നെയാണ് ആലപിച്ചിരിക്കുന്നത്. റാം സുരീന്ദർ സംഗീത സംവിധാനം നിർവഹിച്ചിരിക്കുന്ന ഈ ഗാനത്തിന് തമിഴിൽ വരികൾ രചിച്ചത് ലളിതാനന്ദാണ്. മഞ്ജു വാര്യർ, യോഗി ബാബു എന്നിവരെ കൂടാതെ നെടുമുടി വേണു, ഇന്ദ്രൻസ്, ബേസിൽ ജോസഫ്, കാളിദാസ് ജയറാം, അജു വർഗീസ്, സേതുലക്ഷ്‌മി, ഷായ്‌ലി കിഷൻ, എസ്ഥേർ അനിൽ എന്നിവരാണ് ഈ ചിത്രത്തിലെ പ്രധാന വേഷങ്ങൾ ചെയ്തിരിക്കുന്നത്. ഇപ്പോൾ വന്നിരിക്കുന്ന കിം കിം തമിഴ് വേർഷനിൽ മഞ്ജു വാര്യർക്കൊപ്പം ആടിപ്പാടുന്ന യോഗി ബാബുവിനെയും കാണാം. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ, സന്തോഷ് ശിവൻ, എം പ്രശാന്ത് ദാസ് എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന് തിരക്കഥ രചിച്ചത് സന്തോഷ് ശിവൻ, അജിൽ എന്നിവർ ചേർന്നാണ്.