സൂര്യൻ പൊട്ടി താഴെ വീണാലും വെണ്ണീറാവാത്ത ഒരു കഥയായി അജയന്റെ രണ്ടാം മോഷണം; സക്സസ് ടീസർ കാണാം

യുവതാരം ടോവിനോ തോമസ് പ്രധാന വേഷത്തിലെത്തിയ അജയന്റെ രണ്ടാം മോഷണം ഈ വർഷത്തെ മലയാള സിനിമയിലെ വമ്പൻ വിജയങ്ങളിൽ ഒന്നായി മാറിയിരിക്കുകയാണ്. ഓണ ചിത്രങ്ങളിൽ ബോക്സ് ഓഫീസ് കളക്ഷനിൽ ബഹുദൂരം മുന്നിലാണ് ഈ ചിത്രം സഞ്ചരിക്കുന്നത്. റിലീസ് ചെയ്ത് ആദ്യ മൂന്ന് ദിനം പിന്നിടുമ്പോൾ 9 കോടിക്ക് മുകളിൽ കേരളാ ഗ്രോസും 22 കോടിക്ക് മുകളിൽ ആഗോള ഗ്രോസും നേടിയ ഈ ചിത്രം വീക്കെൻഡ് കഴിയുമ്പോൾ ആഗോള തലത്തിൽ 30 കോടിയോളം നേടുമെന്നാണ് പ്രതീക്ഷിക്കപ്പെടുന്നത്.

പ്രേക്ഷകർക്ക് വമ്പൻ തീയേറ്റർ അനുഭവം നൽകുന്ന ഈ മാസ്സ് ആക്ഷൻ ഫാന്റസി എന്റെർറ്റൈനെർ ചിത്രം കുട്ടികളും കുടുംബ പ്രേക്ഷകരും യുവാക്കളുമെല്ലാം ഒരുപോലെയാണ് സ്വീകരിക്കുന്നത്. ടോവിനോ തോമസിന്റെ കരിയറിലെ തന്നെ ഏറ്റവും വലിയ ഹിറ്റായി ഈ ചിത്രം മാറുമെന്ന് ഉറപ്പായിക്കഴിഞ്ഞു. ചിത്രത്തിന്റെ വിജയം ആഘോഷിച്ചു കൊണ്ട് ഒരു സക്സസ് ടീസറും അണിയറ പ്രവർത്തകർ പുറത്ത് വിട്ടിട്ടുണ്ട്. ടോവിനോ അവതരിപ്പിക്കുന്ന മൂന്നു കഥാപാത്രങ്ങൾക്കും വമ്പൻ കയ്യടിയാണ് പ്രേക്ഷകർ നൽകുന്നത്.

30 കോടിക്ക് മുകളിൽ ബഡ്ജറ്റിലൊരുങ്ങിയ ഈ ചിത്രം നിർമ്മിച്ചിരിക്കുന്നത് മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ്. സുജിത് നമ്പ്യാർ തിരക്കഥ രചിച്ചിരിക്കുന്ന ഈ ചിത്രത്തിൽ കൃതി ഷെട്ടി, സുരഭി ലക്ഷ്മി, ഐശ്വര്യ രാജേഷ്, ബേസിൽ ജോസഫ്, ജഗദീഷ്, ഹരീഷ് ഉത്തമൻ, പ്രമോദ് ഷെട്ടി, രോഹിണി എന്നിവരും വേഷമിട്ടിരിക്കുന്നു.