വീണ്ടും ട്രെൻഡിങ് നൃത്ത ചുവടുമായി പുഷ്പയും ശ്രീവള്ളിയും; കപ്പിൾ സോങ്ങുമായി പുഷ്പ 2

ബ്ലോക്കബ്സ്റ്റർ ചിത്രമായ പുഷ്പയുടെ രണ്ടാം ഭാഗം ഇന്ന് ഇന്ത്യൻ സിനിമാ പ്രേക്ഷകർ ഏറ്റവും കൂടുതൽ കാത്തിരിക്കുന്ന ചിത്രങ്ങളിൽ ഒന്നാണ്. സുകുമാർ രചിച്ചു സംവിധാനം ചെയ്യുന്ന പുഷ്പ 2 ഓഗസ്റ്റ് പതിനഞ്ചിനാണ്‌ പ്രേക്ഷകരുടെ മുന്നിലെത്തുക. ഇപ്പോഴിതാ ഈ ചിത്രത്തിലെ ഏറ്റവും പുതിയ ഗാനം പ്രേക്ഷകരുടെ മുന്നിലെത്തിയിരിക്കുകയാണ്. നായകനായ അല്ലു അർജുനും നായികയായ രശ്‌മിക മന്ദനയും ആടിപാടുന്ന ഈ ഗാനത്തിന്റെ ഹൈലൈറ്റ്, രശ്‌മികയുടെ കിടിലൻ നൃത്ത ചുവടുകളും അല്ലു അർജുന്റെ സ്റ്റൈലിഷ് ലുക്കുമാണ്. കപ്പിൾ സോംങ് എന്ന പേരിൽ റിലീസ് ചെയ്തിരിക്കുന്ന ഈ ഗാനത്തിന്റെ ലിറിക് വീഡിയോയാണ് ഇപ്പോൾ പുറത്ത് വന്നിരിക്കുന്നത്. ശ്രേയ ഘോഷാൽ ആലപിച്ച ഈ ഗാനം രചിച്ചത് ചന്ദ്രബോസും ഇതിന് ഈണം പകർന്നത് റോക്ക് സ്റ്റാർ ദേവി ശ്രീ പ്രസാദുമാണ്. തെലുങ്ക്, മലയാളം, കന്നഡ, തമിഴ്, ഹിന്ദി ഭാഷകളിലാണ് ഈ ഗാനം റിലീസ് ചെയ്തിരിക്കുന്നത്.

ഈ ഗാന ചിത്രീകരണത്തിന്‍റെ ബിഹൈൻഡ് ദി സീൻ രംഗങ്ങൾ ഉപയോഗിച്ചാണ് ലിറിക് വീഡിയോ ഒരുക്കിയിരിക്കുന്നത്. ബോളിവുഡിലെ പ്രമുഖ കൊറിയോഗ്രാഫര്‍ ഗണേഷ് ആചാര്യ നൃത്ത സംവിധാനം നിർവഹിച്ച ഈ ഗാനം ഇതിനോടകം വൈറലായിക്കഴിഞ്ഞു. നവീന്‍ യെര്‍നേനിയും വൈ രവിശങ്കറും ചേർന്ന് മൈത്രി മൂവി മേക്കേഴ്സിന്റെ ബാനറിൽ നിർമ്മിക്കുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. മലയാളി താരം ഫഹദ് ഫാസിൽ, അനസൂയ ഭരദ്വാജ്, സുനിൽ, റാവു രമേശ്, ജഗപതി ബാബു, പ്രകാശ് രാജ്, അജയ് ഘോഷ് , ജഗദീഷ് പ്രതാപ് ഭണ്ഡാരി എന്നിവരും ഇതിൽ വേഷമിട്ടിരിക്കുന്നു. കാർത്തിക് ശ്രീനിവാസ്, നവീൻ നൂലി എന്നിവർ ചേർന്ന് എഡിറ്റിംഗ് നിർവഹിക്കുന്ന ഈ ചിത്രത്തിന് ദൃശ്യങ്ങളൊരുക്കിയത് മിറോസ്ലാവ് കുബ ബ്രോസിക്‌ ആണ്.