സോഷ്യൽ മീഡിയയിൽ തരംഗമായി കേശു ഈ വീടിന്റെ നാഥനിലെ ഗാനം; വമ്പൻ തിരിച്ചു വരവുമായി ജനപ്രിയ നായകൻ..

ജനപ്രിയ നായകൻ ദിലീപ് നായകനായി എത്തുന്ന പുതിയ ചിത്രമാണ് കേശു ഈ വീടിന്റെ നാഥൻ. പ്രശസ്ത സംവിധായകൻ നാദിർഷ സംവിധാനം ചെയ്യുന്ന ഈ ചിത്രത്തിന് തിരക്കഥ രചിച്ചിരിക്കുന്നത് തൊണ്ടിമുതലും ദൃക്‌സാക്ഷിയും പോലത്തെ പ്രേക്ഷക- നിരൂപക പ്രശംസ ഒരുപോലെ നേടിയ ചിത്രം രചിച്ച സജീവ് പാഴൂർ ആണ്. ദിലീപിനൊപ്പം ഉർവശിയും കേന്ദ്ര കഥാപാത്രമായി എത്തുന്ന ഈ ചിത്രത്തിലെ വളരെ രസകരമായ ഒരു ഗാനം ഏതാനും ദിവസങ്ങൾക്കു മുൻപ് റിലീസ് ചെയ്യുകയും ഇപ്പോൾ സോഷ്യൽ മീഡിയയിൽ തരംഗമായി മാറുകയും ചെയ്യുകയാണ്. സൂപ്പർ താരങ്ങളായ മോഹൻലാൽ, മമ്മൂട്ടി, സുരേഷ് ഗോപി എന്നിവർ ചേർന്ന് പുറത്തു വിട്ട ഈ ഗാനം ആലപിച്ചിരിക്കുന്നതും ചിത്രത്തിലെ നായകനായ ദിലീപ് ആണ്. നാരങ്ങാ മിട്ടായി എന്ന് തുടങ്ങുന്ന ഈ ഗാനം ഇതിനോടകം ഏഴു ലക്ഷത്തിലധികം കാഴ്ചക്കാരെ യൂട്യൂബിൽ നിന്നും നേടിക്കഴിഞ്ഞു.

ചിത്രത്തിന്റെ സംവിധായകൻ നാദിര്ഷ തന്നെയാണ് ഈ ഗാനം രചിച്ചിരിക്കുന്നതും ഇതിനു ഈണം പകർന്നിരിക്കുന്നതും. ദിലീപിനൊപ്പം, ഫ്ലവർസ് ചാനലിലെ ടോപ് സിങ്ങർ എന്ന സംഗീത മത്സരത്തിലൂടെ ശ്രദ്ധ നേടിയ വൈഷ്ണവി, വൈഗാലക്ഷ്മി, ബെവൻ, നിമാ എന്നീ കുട്ടികളും, ഈ ഗാനം ആലപിക്കാൻ കൂടെയുണ്ട്. ദിലീപും ഡോക്ടർ സക്കറിയ തോമസും കൂടി നിർമ്മിച്ച ഈ ചിത്രത്തിന് കാമറ ചലിപ്പിച്ചത് അനിൽ നായരും എഡിറ്റ് ചെയ്യുന്നത് സാജനുമാണ്. ദിലീപ്, ഉർവശി എന്നിവരെ കൂടാതെ കലാഭവൻ ഷാജോൺ, ഹരിശ്രീ അശോകൻ, കോട്ടയം നസീർ, ഹരീഷ് കണാരൻ, ജാഫർ ഇടുക്കി, അനുശ്രീ, സ്വാസിക എന്നിവരും ഈ ചിത്രത്തിന്റെ താരനിരയിൽ ഉണ്ട്. ഈ ചിത്രത്തിലെ ദിലീപിന്റെ ലുക്ക് വലിയ രീതിയിൽ സോഷ്യൽ മീഡിയ ഏറ്റെടുത്തിരുന്നു.