ലെഫ്റ്റനന്റ് റാം ആയി ദുൽഖർ സൽമാൻ; സീത രാമം ടീസർ കാണാം

മലയാളത്തിന്റെ യുവ താരം ദുൽഖർ സൽമാൻ നായകനായി അഭിനയിച്ച രണ്ടാമത്തെ തെലുങ്ക് ചിത്രമാണ് സീത രാമം. കീർത്തി സുരേഷ് നായികാ വേഷം ചെയ്ത മഹാനടിക്കു ശേഷം ദുൽഖർ സൽമാൻ വേഷമിട്ട ഈ തെലുങ്കു ചിത്രം വരുന്ന ആഗസ്ത് മാസം പതിനഞ്ചിനാണ്‌ റിലീസ് ചെയ്യാൻ പോകുന്നത്. മലയാളം, തമിഴ് ഭാഷകളിലും മൊഴിമാറ്റിയെത്തുന്ന ഈ ചിത്രത്തിന്റെ പോസ്റ്ററുകൾ, പ്രൊമോ വീഡിയോ എന്നിവയെല്ലാം മികച്ച പ്രേക്ഷക ശ്രദ്ധയാണ് നേടിയെടുത്തിരുന്നത്. അതുപോലെ ഇതിലെ ഒരു ഗാനവും റിലീസ് ചെയ്ത് സൂപ്പർ ഹിറ്റായി മാറിയിരുന്നു. വിശാൽ ചന്ദ്രശേഖർ ഈണമിട്ട ഈ ഗാനത്തിന്റെ മലയാളം പതിപ്പ് ആലപിച്ചത് ശരത്, നിത്യ മാമൻ എന്നിവരാണ്. ഇപ്പോഴിതാ ഈ ചിത്രത്തിന്റെ ആദ്യ ടീസർ കൂടി പ്രേക്ഷകരുടെ മുന്നിലെത്തിക്കഴിഞ്ഞു. മികച്ച പ്രേക്ഷക പ്രതികരണം നേടുന്ന ഈ ടീസർ ചിത്രത്തിന് മേലുള്ള പ്രതീക്ഷയും വർദ്ധിപ്പിക്കുന്നുണ്ട്.

ലെഫ്റ്റനന്റ് റാമിന്റെ പ്രണയകഥ പറയുന്ന ഈ ചിത്രത്തിൽ മൃണാൾ താക്കൂറാണ് നായികാ വേഷം ചെയ്യുന്നത്. ഹനു രാഘവപുടി സംവിധാനം ചെയ്യുന്ന ഈ ചിത്രം നിർമ്മിക്കുന്നത് സ്വപ്ന സിനിമ, വൈജയന്തി മൂവീസ് എന്നിവർ ചേർന്നാണ്. പ്രശസ്ത നായികാ താരമായ രശ്‌മിക മന്ദാനയും ഇതിൽ ഒരു നിർണ്ണായക കഥാപാത്രത്തിന് ജീവൻ നൽകുന്നുണ്ട്. ഈ ചിത്രത്തിന് ക്യാമറ ചലിപ്പിച്ചത് പി എസ് വിനോദ്, ഇത് എഡിറ്റ് ചെയ്യുന്നത് കോട്ടഗിരി വെങ്കിടേശ്വര റാവു എന്നിവരാണ്. സീത രാമം കൂടാതെ ഇനി വരാനുള്ള ദുൽഖർ ചിത്രങ്ങൾ ഹിന്ദി ചിത്രമായ ചുപ്, നെറ്റ്ഫ്ലിസ് സീരിസായ ഗൺസ് ആൻഡ് ഗുലാബ്‌സ് എന്നിവയാണ്.