പറക്കും പപ്പനായി ദിലീപ്; ജനപ്രിയ നായകന്റെ സൂപ്പർ ഹീറോ ചിത്രമൊരുങ്ങുന്നു

ജനപ്രിയ നായകൻ ദിലീപ് നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് പറക്കും പപ്പൻ. ഒരു ദേശി സൂപ്പർ ഹീറോ എന്ന കാഴ്ചപ്പാടിൽ നിന്നും രൂപം കൊണ്ടതാണ് ഈ ചിത്രത്തിന്റെ പ്രമേയമെന്നാണ് സൂചന. പ്രശസ്ത സംവിധായകനും രചയിതാവും നടനുമായ റാഫി തിരക്കഥ രചിക്കുന്ന ഈ ഫാന്റസി ആക്ഷൻ കോമഡി ചിത്രം സംവിധാനം ചെയ്യാൻ പോകുന്നത് നവാഗതനായ വിയാൻ വിഷ്ണുവാണ്. രണ്ടു വർഷങ്ങൾക്കു മുൻപ് ടൈറ്റിൽ പോസ്റ്റർ പുറത്തു വിട്ടു കൊണ്ട് പ്രഖ്യാപിച്ച ഈ ചിത്രം കോവിഡ് സാഹചര്യങ്ങൾ കാരണവും മറ്റു സാങ്കേതിക കാരണങ്ങൾ കൊണ്ടും നീണ്ടു പോവുകയായിരുന്നു. എന്നാലിപ്പോൾ ഈ ചിത്രത്തിന്റെ ചർച്ചകൾക്കായി ദിലീപും റാഫിയും സംവിധായകൻ വിയാൻ വിഷ്ണുവും ഒന്നിച്ചിരിക്കുകയാണ്. ആ സമയത്തെ തങ്ങളുടെ ചിത്രം സംവിധായകൻ പുറത്ത് വിട്ടത് സോഷ്യൽ മീഡിയയിൽ വൈറലായി മാറുകയാണ്.

റാഫി സംവിധാനം ചെയ്യുന്ന വോയിസ് ഓഫ് സത്യനാഥൻ എന്ന ചിത്രത്തിലാണ് ഇപ്പോൾ ദിലീപ് അഭിനയിക്കുന്നത്. ഇതിന്റെ അവസാന ഷെഡ്യൂൾ ജൂലൈ ആദ്യം ആരംഭിക്കും. ഈ ചിത്രം പൂർത്തിയാക്കിയതിനു ശേഷമായിരിക്കും പറക്കും പപ്പന്റെ ജോലികൾ ആരംഭിക്കുക എന്നാണ് സൂചന. വോയിസ് ഓഫ് സത്യനാഥൻ എന്ന ദിലീപ് ചിത്രത്തിൽ ജോജു ജോർജ്, വീണ നന്ദകുമാർ, സിദ്ദിഖ്, ജോണി ആന്റണി എന്നിവരും അഭിനയിക്കുന്നുണ്ട്. റാഫി തന്നെ രചിക്കുകയും ചെയ്ത ഈ ചിത്രം, ബാദുഷ, ദിലീപ്, പ്രിജിൻ, ഷിനോയ് മാത്യു എന്നിവർ ചേർന്നാണ് നിർമ്മിക്കുന്നത്. ജസ്റ്റിൻ വർഗീസ് സംഗീതമൊരുക്കുന്ന ഈ ചിത്രത്തിന് കാമറ ചലിപ്പിക്കുന്നത് ജിതിൻ സ്റ്റാനിസ്ലാവ്, എഡിറ്റ് ചെയ്യുന്നത് ഷമീർ മുഹമ്മദ് എന്നിവരാണ്.