‘ശിക്കാരി ശംഭു’ സ്പെഷ്യൽ ടീസർ; പ്രതീക്ഷയോടെ സിനിമാപ്രേമികൾ

കുഞ്ചാക്കോ ബോബനെ നായകനാക്കി സുഗീത് സംവിധാനം ചെയ്‌ത ‘ശിക്കാരി ശംഭു’ എന്ന ചിത്രം റിലീസിന് തയ്യാറെടുക്കുകയാണ്. കോമഡി ട്രാക്കിലൂടെ കഥ പറയുന്ന ചിത്രം 20 നാണ് തിയറ്ററുകളിൽ എത്തുന്നത്. പീലിപ്പോസ് എന്ന പീലിയായി ചാക്കോച്ചൻ എത്തുന്ന ചിത്രത്തിന്റെ സ്പെഷ്യൽ ടീസർ ഇപ്പോൾ പുറത്തുവന്നിരിക്കുകയാണ്. റിലീസ് തീയതിക്കൊപ്പം ചിത്രത്തിലെ ഒരു സീൻ ഉൾപ്പെടുത്തിയാണ് ടീസർ റിലീസ് ചെയ്‌തിരിക്കുന്നത്‌. ചോക്ലേറ്റ് നായകൻ എന്ന രീതിയിൽ നിന്ന് വ്യത്യസ്തമായുള്ള ഒരു കഥാപാത്രമായിരിക്കും ചാക്കോച്ചൻ അവതരിപ്പിക്കുന്ന ‘പീലി’ എന്നാണ് സൂചന. കുഞ്ചാക്കോ ബോബൻ, ഹരീഷ് കണാരൻ, വിഷ്‌ണു ഉണ്ണികൃഷ്‌ണൻ, ജോണി ആന്റണി എന്നിവരാണ് സ്പെഷ്യൽ ടീസറിലുള്ളത്.

എറണാകുളം ജില്ലയിലെ കോതമംഗലം, ഭൂതത്താൻ കെട്ട് തുടങ്ങിയ സ്ഥലങ്ങളായിരുന്നു പ്രധാന ലൊക്കേഷനുകൾ. പുലിവേട്ടക്കാരാണെന്ന് അവകാശപ്പെടുന്ന മൂന്ന് യുവാക്കൾ ഒരു ഗ്രാമത്തിലെത്തുന്നതും തുടർന്നുണ്ടാകുന്ന സംഭവങ്ങളുമാണ് ചിത്രത്തിന്റെ ഇതിവൃത്തം. ശിവദയാണ് ‘ശിക്കാരി ശംഭു;വിലെ നായിക. വിഷ്‌ണു ഉണ്ണികൃഷ്ണന്റെ ജോഡിയായി അൽഫോൻസ എന്ന പുതുമുഖതാരമാണ് എത്തുന്നത്. ഓർഡിനറി, മധുര നാരങ്ങാ എന്നീ രണ്ടു സൂപ്പർ ബോക്സ് ഓഫീസ് വിജയങ്ങൾ സമ്മാനിച്ച കൂട്ടുകെട്ടാണ് സുഗീത്- കുഞ്ചാക്കോ ബോബൻ എന്നിവരുടേത്. നിഷാദ് കോയയാണ് ചിത്രത്തിന്‍റെ തിരക്കഥയും സംഭാഷണങ്ങളും ഒരുക്കിയിരിക്കുന്നത്. സന്തോഷ് വര്‍മയുടെ വരികള്‍ക്ക് ശ്രീജിത് ഇടവനയാണ് സംഗീതം ഒരുക്കിയിരിക്കുന്നത്. ഫൈസൽ അലിയാണ് ഛായാഗ്രഹണം. ഏയ്ഞ്ചൽ മരിയ സിനിമയുടെ ബാനറിൽ എസ് കെ ലോറൻസ് നിർമ്മിച്ച ഈ ചിത്രത്തിന് തിരക്കഥ ഒരുക്കിയിരിക്കുന്നത് നിഷാദ് കോയ ആണ്.