കാർബൺ തിയേറ്റർ ലിസ്റ്റ് എത്തി; വലിയ പ്രതീക്ഷകളോടെ പ്രേക്ഷകർ..!

മലയാളി പ്രേക്ഷകർ ഏറെ പ്രതീക്ഷകളോടെ കാത്തിരുന്ന ഫഹദ് ഫാസിൽ ചിത്രം കാർബൺ നാളെ മുതൽ കേരളത്തിലെ പ്രദർശനശാലകളിൽ എത്തുകയാണ് . ചിത്രത്തിന്റെ തിയേറ്റർ ലിസ്റ്റ് എത്തി കഴിഞ്ഞു. ഫഹദ് ഫാസിലിന്റെ കരിയറിലെ തന്നെ വ്യത്യസ്തമായ ഒരു വേഷ പകർച്ച ആയിരിക്കും ഈ ത്രില്ലർ ചിത്രത്തിലേതു എന്നാണ് സൂചന . പോയട്രി ഫിലിംസിന്റെ ബാനറിൽ സിബി തോട്ടുപുറം, നാവിസ് സേവ്യർ എന്നിവർ ചേർന്ന് നിർമ്മിച്ച ഈ ചിത്രം രചിച്ചു സംവിധാനം ചെയ്തിരിക്കുന്നത് പ്രശസ്ത ക്യാമറാമാനും സംവിധായകനുമായ വേണു ആണ് . വേണു സംവിധാനം ചെയ്യുന്ന മൂന്നാമത്തെ ചിത്രമായ കാർബൺ കാടിന്റെ പശ്ചാത്തലത്തിൽ കഥ പറയുന്ന ഒരു ത്രില്ലർ ആയാണ് ഒരുക്കിയിരിക്കുന്നതെന്ന സൂചനയാണ് ഇതിന്റെ ട്രൈലെർ നൽകുന്നത്. . ബോളിവുഡ് സംവിധായകൻ വിശാൽ ഭരദ്വാജ് സംഗീതവും ബോളിവുഡിൽ നിന്ന് തന്നെയുള്ള കെ യു മോഹനൻ ക്യാമറയും കൈകാര്യം ചെയ്തിരിക്കുന്ന ഈ ചിത്രത്തിലെ നായികാ വേഷം അവതരിപ്പിചിരിക്കുന്നത് മമത മോഹൻദാസ് ആണ്.

ട്രെയിലറിനും ടീസറിനും അതുപോലെ ഗാനങ്ങൾക്കും മികച്ച പ്രതികരണം ലഭിച്ച ഈ ചിത്രം ഒരു വമ്പൻ വിജയം ആവുമെന്നാണ് ആരാധകരുടെയും അണിയറ പ്രവർത്തകരുടെയും പ്രതീക്ഷ. ഫഹദ് ഫാസിൽ, മമത മോഹൻദാസ് എന്നിവരെ കൂടാതെ ദിലീഷ് പോത്തൻ, സൗബിൻ ഷാഹിർ, മണികണ്ഠൻ ആചാരി, വിജയ രാഘവൻ, നെടുമുടി വേണു, ഷറഫുദീൻ , കൊച്ചു പ്രേമൻ, പ്രവീണ, ചേതൻ ജയലാൽ എന്നിവരും ഈ ചിത്രത്തിൽ നിർണ്ണായകമായ കഥാപാത്രങ്ങളെ അവതരിപ്പിക്കുന്നുണ്ട്. ഫഹദ് ഫാസിലിന്റെ ഈ വർഷത്തെ ആദ്യത്തെ റിലീസ് എന്ന നിലയിലും കാർബണിന്റെ വരവേൽക്കാൻ കാത്തിരിക്കുകയാണ് ആരാധകർ.