തിങ്കളാഴ്ച നിശ്ചയത്തിന് ശേഷം വീണ്ടും സെന്ന ഹെഗ്‌ഡെ; 1744 വൈറ്റ് ആൾട്ടോ ടീസർ ഇതാ..!

തിങ്കളാഴ്ച്ച നിശ്ചയമെന്ന സൂപ്പർ ഹിറ്റ് ചിത്രമൊരുക്കി മലയാള സിനിമയിലരങ്ങേറ്റം കുറിച്ച സംവിധായകനാണ് സെന്ന ഹെഗ്‌ഡെ. നേരിട്ടുള്ള ഒറ്റിറ്റി റിലീസായി സോണി ലൈവിലെത്തിയ ഈ ചിത്രം ഇന്ത്യ മുഴുവൻ ശ്രദ്ധ നേടിയെടുത്തു. കാഞ്ഞങ്ങാട് സ്ലാംഗിൽ സംസാരിച്ച കഥാപാത്രങ്ങളും അവിടെ നടന്ന കഥയും ഈ ചിത്രത്തെ ഏറെ രസകരമാക്കി. ഇപ്പോഴിതാ തിങ്കളാഴ്ച നിശ്ചയത്തിന് ശേഷം വീണ്ടും കാഞ്ഞങ്ങാട് നടക്കുന്ന രസകരമായ ഒരു കഥയുമായി എത്തുകയാണീ സംവിധായകൻ. ഇത്തവണ ഒരു കോമഡി ത്രില്ലറുമായാണ് അദ്ദേഹമെത്തുന്നത്. 1744 വൈറ്റ് ആൾട്ടോ എന്ന് പേരിട്ടിരിക്കുന്ന ഈ ചിത്രത്തിന്റെ ടീസർ ഇന്നലെ പുറത്ത് വന്നു. വളരെ രസകരമായ ഒരു അന്വേഷണ ചിത്രമാണിതെന്ന സൂചനയാണ് ഈ ടീസർ നമ്മുക്ക് തരുന്നത്. ഇതിന്റെ രണ്ടാമത്തെ ടീസറാണ് ഇപ്പോൾ പുറത്തു വന്നിരിക്കുന്നത്.

ഇതിന്റെ ആദ്യ ടീസറും മികച്ച പ്രേക്ഷക ശ്രദ്ധയാണ് നേടിയെടുത്തത്. ഷറഫുദ്ദീന്‍ നായകനാവുന്ന ചിത്രത്തില്‍ വിന്‍സി അലോഷ്യസാണ് നായികാ വേഷം ചെയ്യുന്നത്. രാജേഷ് മാധവന്‍, നവാസ് വള്ളിക്കുന്ന്, ആര്യ സലിം, ആനന്ദ് മന്‍മഥന്‍, സജിന്‍ ചെറുകയില്‍, ആര്‍ജെ നില്‍ജ, രഞ്ജി കാങ്കോല്‍ എന്നിവരുമഭിനയിക്കുന്ന ഈ ചിത്രം കബിനി ഫിലിംസിന്‍റെ ബാനറില്‍ മൃണാള്‍ മുകുന്ദന്‍, ശ്രീജിത്ത് നായര്‍, വിനോദ് ദിവാകര്‍ എന്നിവർ ചേർന്നാണ് നിർമ്മിക്കുന്നത്. ശ്രീരാജ് രവീന്ദ്രനൊപ്പം ചേർന്ന് സംവിധായകൻ തന്നെയാണ് ഈ ചിത്രത്തിന്റെ തിരക്കഥയും രചിച്ചിരിക്കുന്നത്. ഈ ചിത്രത്തിന് വേണ്ടി ക്യാമറ ചലിപ്പിച്ചതും ശ്രീരാജ് രവീന്ദ്രൻ തന്നെയാണ്. അര്‍ജുന്‍ ബി എന്ന നവാഗതനും ഇതിന്റെ തിരക്കഥയിൽ സഹകരിച്ചിട്ടുണ്ട്. ഹരിലാല്‍ കെ രാജീവ് എഡിറ്റ് ചെയ്യുന്ന ഈ ചിത്രത്തിന് സംഗീതമൊരുക്കിയത് മുജീബ് മജീദ് ആണ്.