ഒന്നും അവസാനിച്ചിട്ടില്ല, ഇതൊരു തുടക്കം മാത്രം; ആക്ഷൻ വിസ്മയവുമായി ഷാരൂഖ് ഖാൻ തിരിച്ചു വരുന്നു; പത്താൻ ടീസർ കാണാം

ബോളിവുഡിന്റെ കിംഗ് ഖാൻ എന്നറിയപ്പെടുന്ന ഷാരൂഖ് ഖാൻ ഇന്ന് തന്റെ അന്പത്തിയാറാം ജന്മദിനം ആഘോഷിക്കുകയാണ്. അതിന്റെ ഭാഗമായി അദ്ദേഹത്തിന്റെ പുതിയ ചിത്രമായ പത്താന്റെ ടീസർ റിലീസ് ചെയ്തിരിക്കുകയാണ് അണിയറ പ്രവർത്തകർ. മാസ്സ് ലുക്കിൽ, പത്താൻ എന്ന് പേരുള്ള സ്പൈ ആയി ഷാരൂഖ് ഖാൻ പ്രത്യക്ഷപ്പെടുന്ന ഈ ചിത്രം ഒരു ആക്ഷൻ വിസ്മയം തന്നെയാണ് പ്രേക്ഷകർക്ക് മുന്നിലെത്തിക്കുന്നതെന്ന സൂചനയാണ് ഇതിന്റെ ടീസർ നമ്മുക്ക് തരുന്നത്. ടീസറിലെ ഷാരൂഖ് ഖാന്റെ ഡയലോഗുകൾ എല്ലാം തന്നെ ഇപ്പോൾ സോഷ്യൽ മീഡിയയിൽ സൂപ്പർ ഹിറ്റായി കഴിഞ്ഞു. പത്താൻ കാത്തിരിക്കുന്ന പ്രേക്ഷകരുടെ ആവേശവും പ്രതീക്ഷയും ആകാംഷയും വർധിപ്പിക്കുന്ന തരത്തിലാണ് ഈ ടീസർ ഒരുക്കിയിരിക്കുന്നത്. കഴിഞ്ഞ കുറച്ചു വർഷങ്ങളായി ഷാരൂഖ് ഖാൻ ചിത്രങ്ങൾ ഒന്നും തന്നെ റിലീസ് ചെയ്തിരുന്നില്ല. അതിനു മുൻപ് തുടർ പരാജയങ്ങൾ വന്നപ്പോൾ അദ്ദേഹം അഭിനയ ജീവിതത്തിൽ നിന്ന് ബ്രേക്കും എടുത്തിരുന്നു.

ഏതായാലും കിംഗ് ഖാന്റെ വമ്പൻ തിരിച്ചു വരവായിരിക്കും പത്താൻ എന്ന സൂചനയാണ് ഈ ടീസർ നൽകുന്നത്. ബോളിവുഡ് താരസുന്ദരി ദീപിക പദുകോൺ നായികാ വേഷം ചെയ്യുന്ന ഈ ചിത്രത്തിലെ വില്ലൻ വേഷം ചെയുന്നത് ജോൺ എബ്രഹാമാണ്. ബോളിവുഡ് മെഗാസ്റ്റാർ സൽമാൻ ഖാൻ തന്റെ സൂപ്പർ ഹിറ്റ് സ്പൈ കഥാപാത്രമായ ടൈഗർ ആയി പത്താനിൽ അതിഥി വേഷത്തിലും എത്തുന്നുണ്ട്. വാർ എന്ന ബ്ലോക്ക്ബസ്റ്റർ ഹൃതിക് റോഷൻ- ടൈഗർ ഷെറോഫ് ചിത്രത്തിന് ശേഷം സിദ്ധാർഥ് ആനന്ദ് സംവിധാനം ചെയ്ത ചിത്രമാണ് പത്താൻ. അടുത്ത വർഷം ജനുവരിയിലാണ് പത്താൻ റിലീസ് ചെയ്യുന്നത്.