കുഞ്ചാക്കോ ബോബൻ- ആന്റണി വർഗീസ്- അർജുൻ അശോകൻ ടീമിന്റെ ചാവേറുമായി ടിനു പാപ്പച്ചൻ; ടൈറ്റിൽ പുറത്ത് വിട്ട് മമ്മൂട്ടി

സ്വാതന്ത്ര്യം അര്‍ദ്ധരാത്രിയില്‍, അജഗജാന്തരം എന്നീ ചിത്രങ്ങള്‍ക്കുശേഷം ടിനു പാപ്പച്ചന്‍ സംവിധാനം ചെയ്യുന്ന പുതിയ ചിത്രത്തിന്റെ ടൈറ്റിൽ ഇന്ന് പുറത്ത് . കുഞ്ചാക്കോ ബോബൻ നായകനായി എത്തുന്ന ഈ ചിത്രത്തിന്റെ പേര് ചാവേർ എന്നാണ്. ഒരു ആക്ഷൻ ത്രില്ലറായി ഒരുക്കുന്ന ഇതിന്റെ ടൈറ്റിൽ ഇന്ന് റിലീസ് ചെയ്തത് മെഗാസ്റ്റാർ മമ്മൂട്ടിയാണ്. കുഞ്ചാക്കോ ബോബന്റെ ജന്മദിനം പ്രമാണിച്ചാണ് ഈ ടൈറ്റിൽ പോസ്റ്റർ റിലീസ് ചെയ്തത്. മലയാളത്തിലെ പ്രശസ്ത നടനും സംവിധായകനും രചയിതാവുമായ ജോയ് മാത്യു, മമ്മൂട്ടി നായകനായ അങ്കിൾ എന്ന ചിത്രത്തിന് ശേഷം തിരക്കഥ രചിച്ച ചിത്രം കൂടിയാണ് ചാവേർ. 2018 ഇൽ പുറത്തു വന്ന ആ ചിത്രത്തിന് ശേഷം അദ്ദേഹം രചിച്ച ഈ ചിത്രം നിർമ്മിക്കുന്നത് അരുൺ നാരായൺ പ്രൊഡക്ഷൻസിന്റെ ബാനറിൽ അരുൺ നാരായൺ ആണ് നിർമ്മിക്കുന്നത്. മാമാങ്കത്തിന് ശേഷം വേണു കുന്നപ്പിള്ളിയും ഈ ചിത്രത്തിന്റെ നിർമ്മാണത്തിൽ സഹകരിക്കുന്നുണ്ട്.

കുഞ്ചാക്കോ ബോബന്‍, ആന്റണി വര്‍ഗീസ്, അര്‍ജുന്‍ അശോകന്‍ എന്നിവർ പ്രധാന വേഷങ്ങൾ ചെയ്യുന്ന ഈ ചിത്രത്തിൽ രാജേഷ് ശര്‍മ്മ, കെ.യു. മനോജ്, അനുരൂപ് എന്നിവരും, ഒട്ടേറെ പുതുമുഖങ്ങളും അഭിനയിക്കുന്നുണ്ട്. ഇതിന്റെ ചിത്രീകരണത്തിനായി തലശ്ശേരിയിൽ ഇട്ട സെറ്റ് വമ്പൻ ജനശ്രദ്ധ നേടിയതും, അതുപോലെ ഇതിലെ ആക്ഷൻ സീൻ ഒരുക്കുന്നതിനിടെ കുഞ്ചാക്കോ ബോബന് പരിക്ക് പറ്റിയതും വലിയ വാർത്തയായി മാറിയിരുന്നു. ഇതിനു വേണ്ടി തലശ്ശേരി കടല്‍പാലത്തിനോട് ചേര്‍ന്ന തായലങ്ങാടിയില്‍ കലാസംവിധായകൻ ഗോകുൽ ദാസ് ഒരുക്കിയ പടുകൂറ്റൻ സെറ്റാണ് വലിയ ഹിറ്റായി മാറിയത്. ജിന്റോ ജോർജ് ക്യാമറ ചലിപ്പിക്കുന്ന ഈ ചിത്രത്തിന് സംഗീതമൊരുക്കുന്നത് ജസ്റ്റിൻ വർഗീസ്, എഡിറ്റ് ചെയ്യുന്നത് നിഷാദ് യൂസഫ് എന്നിവരാണ്.