ആക്ഷന്റെ പൂരവുമായി മഹേഷ് ബാബു ചിത്രമെത്തുന്നു; സര്‍ക്കാരു വാരി പാട്ട ട്രെയ്‌ലര്‍ കാണാം..!

തെലുങ്കു സൂപ്പർ താരം മഹേഷ് ബാബു നായകനായെത്തുന്ന ഏറ്റവും പുതിയ ചിത്രമാണ് സര്‍ക്കാരു വാരി പാട്ട ട്രെയ്‌ലര്‍. കീർത്തി സുരേഷ് നായികാ വേഷം ചെയ്യുന്ന ഈ ചിത്രം മെയ് 12ന് ചിത്രം ലോകമെമ്പാടും റിലീസ് ചെയ്യും. ഈ ബിഗ് ബഡ്ജറ്റ് ചിത്രത്തിന്റെ ട്രൈലെർ ഇന്നലെ വൈകുന്നേരമാണ് റിലീസ് ചെയ്തത്. ആക്ഷന്‍ രംഗങ്ങള്‍ക്ക് പ്രാധാന്യം നല്‍കിയാണ് ചിത്രത്തിന്റെ ട്രെയ്‌ലര്‍ ഒരുക്കിയിരിക്കുന്നത്. അത്കൊണ്ട് തന്നെ ചിത്രത്തിന് മേലുള്ള ആരാധകരുടെ പ്രതീക്ഷയിപ്പോൾ വാനോളമാണ്. മൈത്രി മൂവി മേക്കേഴ്‌സിന്റെ യൂട്യൂബ് ചാനലിലൂടെ റിലീസ് ചെയ്ത ഈ ട്രൈലെർ ഇപ്പോൾ റെക്കോർഡ് കാഴ്ചക്കാരെയാണ് നേടിക്കൊണ്ടിരിക്കുന്നത്. ജനുവരി 13 ന് റിലീസ് ചെയ്യാന്‍ പ്ലാന്‍ ചെയ്തിരുന്ന ഈ ചിത്രം കോവിഡ് മൂന്നാം തരംഗം മൂലം മാറ്റി വെക്കുകയായിരുന്നു.

പരശുറാം പെട്‌ല കഥയെഴുതി സംവിധാനം ചെയ്തിരിക്കുന്ന ഈ ചിത്രം മൈത്രി മൂവി മേക്കേഴ്‌സ്, ജി.എം.ബി എന്റര്‍ടൈന്‍മെന്റ്, 14 റീല്‍സ് പ്ലസ് എന്നിവയുടെ ബാനറില്‍ നവീന്‍ യെര്‍നേനി, വൈ. രവിശങ്കര്‍, രാം അജന്ത, ഗോപിചന്ദ് അജന്ത എന്നിവര്‍ ചേര്‍ന്നാണ് നിർമ്മിച്ചിരിക്കുന്നത്. എസ്. തമന്‍ സംഗീതം നൽകിയിരിക്കുന്ന ഈ ചിത്രത്തിന്റെ ഛായാഗ്രഹണം ആര്‍. മാധിയാണ് നിർവഹിച്ചിരിക്കുന്നത്. മാര്‍ത്താണ്ഡ് കെ വെങ്കിടേഷ് എഡിറ്റ് ചെയ്തിരിക്കുന്ന ഈ ചിത്രത്തിലെ ഒരു ഗാനം നേരത്തെ പുറത്ത് വന്നു വമ്പൻ ഹിറ്റായി മാറിയിരുന്നു. കലാവതി എന്ന് തുടങ്ങുന്ന ആ ഗാനത്തിന്റെ ലിറിക്കൽ വീഡിയോയാണ് റെക്കോർഡ് സൃഷ്ടിച്ചത്. സിദ് ശ്രീറാം ആലപിച്ചിരിക്കുന്ന ഈ ഗാനം രചിച്ചിരിക്കുന്നത് അനന്ത് ശ്രീറാമാണ്‌. വെണ്ണല കിഷോർ, സുബ്ബരാജു എന്നിവരും ഈ ചിത്രത്തിന്റെ താരനിരയുടെ ഭാഗമാണ്.