‘സാറേ ഞങ്ങൾ ഇങ്ങനാ’; ‘ക്വീൻ’ എന്ന ചിത്രത്തിലെ ആദ്യഗാനം പുറത്ത്

പ്രേമം, ഹാപ്പി വെഡ്ഡിങ്, ആനന്ദം എന്നീ ചിത്രങ്ങൾക്ക് ശേഷം കാമ്പസ് പശ്ചാത്തലമാക്കി ഒരുങ്ങുന്ന ചിത്രമാണ് ‘ക്വീൻ’. ചിത്രത്തിലെ ‘സാറേ’ എന്ന് തുടങ്ങുന്ന ഗാനം ഇപ്പോൾ പുറത്തുവന്നിരിക്കുകയാണ്. ബെന്നി ദയാൽ, ജേക്സ്, സിയ, കവിത ഗോപി എന്നിവർ ചേർന്നാണ് ഗാനം ആലപിച്ചിരിക്കുന്നത്. ജോയ് പോളിന്റെ വരികൾക്ക് സംഗീതം നൽകിയിരിക്കുന്നത് ജേക്സ് ബിജോയ് ആണ്. സാറേ- ദ ബെക്‌ബെഞ്ചർ സോങ് എന്ന പേരിലാണ് ഗാനം പുറത്തിറക്കിയിരിക്കുന്നത്. റിലീസായി മണിക്കൂറുകൾക്കുള്ളിൽ തന്നെ മികച്ച പ്രതികരണം നേടി ഗാനം മുന്നേറുകയാണ്.

ആണ്‍കുട്ടികളുടെ മാത്രം കോട്ടയായ മെക്കാനിക്കല്‍ എഞ്ചിനീയറിങ്ങിന് ഒരു പെണ്‍കുട്ടി പഠിക്കാനെത്തിയാല്‍ സംഭവിക്കുന്ന കാര്യങ്ങളാണ് ‘ക്വീൻ’ എന്ന ചിത്രത്തിന്റെ പ്രമേയം. ക്യാമ്പസ് രാഷ്ട്രീയവും ഡിപ്പാര്‍ട്ട്‌മെന്റുകള്‍ തമ്മിലുള്ള മത്സരവും എല്ലാമടങ്ങിയ സമ്പൂര്‍ണ ക്യാമ്പസ് പാക്കേജ് തന്നെയായിരിക്കും ചിത്രമെന്നാണ് സൂചന.

ഡിജോ ജോസ് ആന്റണി സംവിധാനം ചെയ്യുന്ന ചിത്രം നിര്‍മിക്കുന്നത് ഷിബു കെ മൊയ്ദീനും റിന്‍ഷാദ് വെള്ളോടത്തിലും ചേർന്നാണ്. മെക്കാനിക്കല്‍ എഞ്ചിനീയറന്‍മാരായ ജെബിന്‍, ജോസഫ് ആന്റണി, ഷാരിസ് മുഹമ്മദ് എന്നിവര്‍ ചേര്‍ന്നാണ് തിരക്കഥ തയ്യാറാക്കിയിരിക്കുന്നത്.