മാരി 2 ലെ റൗഡി ബേബി സോങ് വീഡിയോ എത്തി; ഗംഭീര സ്വീകരണം നൽകി സോഷ്യൽ മീഡിയ..!

ധനുഷ്- ടോവിനോ ചിത്രമായ മാരി 2 ഈ കഴിഞ്ഞ ക്രിസ്മസ് ആഘോഷത്തിന്റെ ഭാഗമായാണ് ലോകം മുഴുവൻ റിലീസ് ചെയ്തത്. വമ്പൻ റിലീസ് ആയി കേരളത്തിൽ എത്തിയ ഈ ചിത്രം ഇവിടെ എത്തിച്ചത് എസ് വിനോദ് കുമാർ , സുകുമാരൻ തെക്കേപ്പാട്ടു എന്നിവരുടെ നേതൃത്വത്തിൽ ഉള്ള മിനി സ്റ്റുഡിയോ ആണ്. മികച്ച പ്രേക്ഷക പ്രതികരണം നേടിയെടുത്ത ഈ ചിത്രം ധനുഷിന്റെ കരിയറിലെ തന്നെ ഏറ്റവും മികച്ച വിജയങ്ങളിൽ ഒന്നാണ്. വണ്ടർ ബാർ സ്റ്റുഡിയോയുടെ ബാനറിൽ ധനുഷ് തന്നെയാണ് ഈ ചിത്രം നിർമ്മിച്ചതും. ഇപ്പോഴിതാ ഈ ചിത്രത്തിലെ സൂപ്പർ ഹിറ്റ് ഗാനമായ റൗഡി ബേബിയുടെ വീഡിയോ റിലീസ് ചെയ്തിരിക്കുകയാണ്. ഗംഭീര സ്വീകരണമാണ് ഈ ഗാനത്തിന് ആരാധകർ സോഷ്യൽ മീഡിയയിൽ കൊടുത്തിരിക്കുന്നത്.

യുവാൻ ശങ്കർ രാജ ഈണം പകർന്ന ഈ ഗാനം രചിച്ചത് ധനുഷ് തന്നെയാണ്. ധനുഷും ധീയും ചേർന്നാണ് ഈ ഗാനം ആലപിച്ചിരിക്കുന്നത്. ചിത്രത്തിലെ നായികാ വേഷം ചെയ്യുന്ന സായി പല്ലവിയുടെ കഥാപാത്രവുമൊത്തു ധനുഷിന്റെ മാരി ആടി പാടുന്ന രസകരമായ രംഗങ്ങൾ ആണ് ഈ ഗാനത്തിന്റെ സവിശേഷത. വളരെ മനോഹരമായി ചിത്രീകരിച്ചിരിക്കുന്ന ഈ ഗാനം വളരെ എനെർജെറ്റിക്ക് ആയാണ് യുവാൻ ശങ്കർ രാജ ഒരുക്കിയിരിക്കുന്നത്. ടോവിനോ തോമസ് ആണ് ഈ ചിത്രത്തിലെ വില്ലൻ വേഷം ചെയ്തിരിക്കുന്നത്. ഭീജ എന്ന കഥാപാത്രത്തെ അവതരിപ്പിച്ച ടോവിനോ ഗംഭീര പ്രശംസയാണ് നേടിയെടുക്കുന്നത് എന്ന് പറയാം. ബാലാജി മോഹൻ രചനയും സംവിധാനവും നിർവഹിച്ച ഈ ചിത്രത്തിൽ വരലക്ഷ്മി ശരത് കുമാർ, കൃഷ്ണ കുലശേഖരൻ, വിദ്യ പ്രദീപ്, റോബോ ശങ്കർ, കല്ലൂരി വിനോദ് എന്നിവരും അഭിനയിച്ചിരിക്കുന്നു.