രെഞ്ജിതമേ രെഞ്ജിതമേ; ദളപതിയുടെ ശബ്ദവും നൃത്ത ചുവടുകളുമായി വാരിസിലെ ആദ്യ ഗാനം; വീഡിയോ കാണാം

തമിഴകത്തിന്റെ ദളപതി വിജയ് നായകനായി എത്തുന്ന ഏറ്റവും പുതിയ ചിത്രമായ വാരിസിലെ ആദ്യ ഗാനത്തിന്റെ പ്രോമോ വീഡിയോ ഇന്ന് റിലീസ് ചെയ്തിരിക്കുകയാണ്. രെഞ്ജിതമേ രെഞ്ജിതമേ എന്ന വരികളോടെ തുടങ്ങുന്ന ഈ ഗാനത്തിന് വരികൾ രചിച്ചത് വിവേകും ഈ ഗാനം ആലപിച്ചിരിക്കുന്നത് ദളപതി വിജയ്, എം എം മാനസി എന്നിവരും ചേർന്നാണ്. എസ് തമൻ സംഗീത സംവിധാനം നിർവഹിക്കുന്ന ഈ ചിത്രത്തിൽ രശ്‌മിക മന്ദാനയാണ് നായികാ വേഷം ചെയ്യുന്നത്. ഈ ഗാനം മുഴുവനായി നവംബർ അഞ്ചിനാണ് റിലീസ് ചെയ്യുക. ഇപ്പോൾ വന്ന ഈ പ്രോമോ വീഡിയോയുടെ ഹൈലൈറ്റ് പതിവ് പോലെ ദളപതി വിജയ്‌യുടെ കിടിലൻ നൃത്ത ചുവടുകൾ തന്നെയാണ്. അതിനോടൊപ്പം വിജയ് ആണ് ഈ ഗാനം ആലപിച്ചിരിക്കുന്നതെന്നതും ആരാധകർക്ക് ആവേശം പകരുന്നുണ്ട്. ഈ ചിത്രത്തിന്റെ ഫസ്റ്റ് ലുക്ക്, സെക്കന്റ് ലുക്ക് പോസ്റ്ററുകൾ, ഏതാനും ലൊക്കേഷൻ സെൽഫികൾ എന്നിവയും നേരത്തെ തന്നെ സോഷ്യൽ മീഡിയയിൽ വമ്പൻ ഹിറ്റാണ്.

ശ്രീ വെങ്കടേശ്വര ക്രിയേഷന്‍സിന്‍റെ ബാനറില്‍ ദില്‍ രാജുവും ശിരീഷും ചേർന്ന് നിർമ്മിക്കുന്ന വാരിസ് വംശി പൈഡിപ്പള്ളിയാണ് സംവിധാനം ചെയ്യുന്നത്. ഇപ്പോൾ അവസാന ഘട്ട ഷൂട്ടിങ്ങിൽ ഉള്ള ഈ ചിത്രം ഈ വരുന്ന ജനുവരിയിൽ പൊങ്കൽ റിലീസായി പ്രേക്ഷകരുടെ മുന്നിലെത്തും. ശരത് കുമാര്‍, പ്രകാശ് രാജ്, ശ്യാം, പ്രഭു, ജയസുധ, ശ്രീകാന്ത്, ഖുശ്ബു, സംഗീത കൃഷ്‍ണ തുടങ്ങിയവരും വേഷമിടുന്ന ഈ ചിത്രത്തിന് ക്യാമറ ചലിപ്പിക്കുന്നത് കാർത്തിക് പളനിയും എഡിറ്റ് ചെയ്യുന്നത് പ്രവീൺ കെ എല്ലുമാണ്. ഇതിലെ ദളപതിയുടെ കഥാപാത്രത്തിന്റെ പേര് വിജയ് രാജേന്ദ്രന്‍ എന്നായിരിക്കുമെന്നും, ഇതിൽ അദ്ദേഹം ഒരു ആപ്പ് ഡെവലപ്പര്‍ ആയിട്ടാവും അഭിനയിക്കുകയെന്നും റിപ്പോർട്ടുകൾ വന്നിരുന്നു.