അനൂപ് മേനോന്റെ സംവിധാനത്തിൽ പദ്മ; ചിത്രത്തിലെ പുത്തൻ വീഡിയോ സോങ് കാണാം..!

പ്രശസ്ത നടനും രചയിതാവുമായ അനൂപ് മേനോൻ സംവിധാനം ചെയ്ത പുതിയ ചിത്രമാണ് പദ്മ. കിംഗ് ഫിഷ് എന്ന ചിത്രത്തിന് ശേഷം അനൂപ് മേനോനൊരുക്കിയ ഈ ചിത്രം വൈകാതെ റിലീസിനൊരുങ്ങുകയാണ്. അതിനു മുൻപായി ഇപ്പോഴിതാ ഈ ചിത്രത്തിലെ പുതിയ ഗാനം പ്രേക്ഷകരുടെ മുന്നിലെത്തിക്കഴിഞ്ഞു. അനൂപ് മേനോൻ തന്നെ വരികളെഴുതിയ പവിഴ മന്താര എന്ന് തുടങ്ങുന്ന ഗാനമാണിപ്പോൾ റിലീസ് ചെയ്തിരിക്കുന്നത്. രാജ്‌കുമാർ രാധാകൃഷ്ണൻ ആലപിച്ച ഈ ഗാനത്തിന് സംഗീതം പകർന്നിരിക്കുന്നത് നിനോയ് വർഗീസാണ്. അനൂപ് മേനോൻ സ്റ്റോറീസിന്റെ ബാനറിൽ അദ്ദേഹം തന്നെ നിർമ്മിച്ചിരിക്കുന്ന ഈ ചിത്രത്തിലെ പ്രധാന വേഷങ്ങൾ ചെയ്തിരിക്കുന്നത് അദ്ദേഹവും ദേശീയ അവാർഡ് ജേതാവായ നടി സുരഭി ലക്ഷ്മിയുമാണ്. മ്യൂസിക് 24 x 7 ന്റെ യൂട്യൂബ് ചാനലിലൂടെയാണ് ഇന്ന് വന്ന പുതിയ ഗാനം പ്രേക്ഷകരുടെ മുന്നിലെത്തിയത്.

നേരത്തെ ഈ ചിത്രത്തിലെ കനൽകാറ്റിലെങ്ങോ എന്ന വിജയ് യേശുദാസ് പാടിയ ഗാനവും, കാണാതെ കണ്ണിനുള്ളില്‍ എന്ന ഹരിശങ്കർ പാടിയ ഗാനവും പ്രേക്ഷകരുടെ മുന്നിലെത്തുകയും മികച്ച ശ്രദ്ധ നേടുകയും ചെയ്തിരുന്നു. ശങ്കര്‍ രാമകൃഷ്ണന്‍, ശ്രുതി രജനീകാന്ത്, മെറീന മൈക്കിള്‍ തുടങ്ങിയ താരങ്ങളും പ്രധാന കഥാപാത്രങ്ങളെ അവതരിപ്പിക്കുന്ന ഈ ചിത്രത്തിൽ, ഒട്ടേറെ പുതുമുഖങ്ങളും വേഷമിടുന്നുണ്ട്. മഹാദേവന്‍ തമ്പി ഛായാഗ്രഹണവും സിയാൻ എഡിറ്റിംഗും നിരവഹിച്ചിരിക്കുന്ന ഈ ചിത്രത്തിന്റെ കഥ, തിരക്കഥ, സംഭാഷണം എന്നിവയൊരുക്കിയിരിക്കുന്നതും അനൂപ് മേനോന്‍ തന്നെയാണ്. ചിത്രത്തിന്റെതായി ഇതിനോടകം പുറത്തിറങ്ങിയ ടീസറുകളും പോസ്റ്ററുകളും, അതുപോലെ ശ്രുതി രജനികാന്തിന്റെ ടിക് ടോക് ഡാന്‍സ് ഉള്‍പ്പെടുത്തിയ വീഡിയോയും ഏറെ ശ്രദ്ധ നേടിയിരുന്നു.