മനോഹരമായ മെലഡി; രസകരമായ പ്രണയവുമായി ബ്രോ ഡാഡിയിലെ ആദ്യ ഗാനം കാണാം..!

കംപ്ലീറ്റ് ആക്ടർ മോഹൻലാൽ, യുവ സൂപ്പർ താരം പൃഥ്വിരാജ് സുകുമാരൻ എന്നിവർ പ്രധാന വേഷം ചെയ്യുന്ന ചിത്രമാണ് ബ്രോ ഡാഡി. മോഹൻലാൽ നായകനായ ലൂസിഫർ ഒരുക്കി സംവിധായകനായി അരങ്ങേറ്റം കുറിച്ച പൃഥ്വിരാജ് സുകുമാരൻ മോഹൻലാലിനെ തന്നെ നായകനാക്കി സംവിധാനം ചെയ്ത തന്റെ രണ്ടാമത്തെ ചിത്രമാണ് ബ്രോ ഡാഡി. നവാഗതരായ ശ്രീജിത്ത്, ബിബിൻ എന്നിവർ ചേർന്ന് രചിച്ച ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിച്ചിരിക്കുന്നത്. ഇതിന്റെ ടീസർ, ട്രൈലെർ എന്നിവ നേരത്തെ പുറത്തു വരികയും സോഷ്യൽ മീഡിയയിൽ സൂപ്പർ ട്രെൻഡിങ് ആയി മാറുകയും ചെയ്തിരുന്നു. ഇപ്പോഴിതാ ഈ ചിത്രത്തിലെ ആദ്യ വീഡിയോ ഗാനം റിലീസ് ചെയ്തിരിക്കുകയാണ്. ആശീർവാദ് സിനിമാസിന്റെ മ്യൂസിക് ലേബലിൽ പുറത്തു വരുന്ന ആദ്യ ഗാനം എന്ന പ്രത്യേകതയും ഇതിനുണ്ട്. ആശീർവാദ് സിനിമാസിന്റെ തന്നെ ഒഫീഷ്യൽ യൂട്യൂബ് ചാനൽ വഴിയാണ് ഈ ഗാനം റിലീസ് ചെയ്തിരിക്കുന്നത്.

ദീപക് ദേവ് സംഗീതം പകർന്ന, പറയാതെ വന്നെൻ എന്ന വരികളോടെ തുടങ്ങുന്ന ഈ മനോഹരമായ മെലഡി ആലപിച്ചിരിക്കുന്നത് എം ജി ശ്രീകുമാർ- വിനീത് ശ്രീനിവാസൻ ടീം ആണ്. ലക്ഷ്മി ശ്രീകുമാർ ആണ് ഈ ഗാനത്തിന് വേണ്ടി വരികൾ രചിച്ചിരിക്കുന്നത്. മൂന്നു പാട്ടുകൾ ആണ് ഈ ചിത്രത്തിൽ ഉള്ളതെന്ന് ദീപക് ദേവ് കഴിഞ്ഞ ദിവസം വെളിപ്പെടുത്തിയിരുന്നു. ജോൺ കാറ്റാടി, ഈശോ ജോൺ കാറ്റാടി എന്ന പേരിൽ അപ്പനും മകനും ആയാണ് മോഹൻലാൽ, പൃഥ്വിരാജ് ടീം ഈ ചിത്രത്തിൽ അഭിനയിച്ചിരിക്കുന്നത്. മോഹൻലാലിന്റെ ഭാര്യ ആയി മീന അഭിനയിക്കുമ്പോൾ പൃഥ്വിരാജ് സുകുമാരന്റെ ജോഡി ആയി കല്യാണി പ്രിയദർശൻ ആണ് എത്തിയിരിക്കുന്നത്. ഇവരെ കൂടാതെ ലാലു അലക്സ്, കനിഹ, സൗബിൻ ഷാഹിർ, ഉണ്ണി മുകുന്ദൻ, ജഗദീഷ്, ജാഫർ ഇടുക്കി, മല്ലിക സുകുമാരൻ എന്നിവരും ഈ ചിത്രത്തിന്റെ താരനിരയിൽ ഉണ്ട്. ഡിസ്‌നി പ്ലസ് ഹോട്ട് സ്റ്റാർ റിലീസ് ആയി ജനുവരി ഇരുപത്തിയാറിനു ആണ് ബ്രോ ഡാഡി സ്ട്രീം ചെയ്യുക.