ഇഴുകി ചേർന്ന് പ്രിയ വാര്യരും സർജാനോ ഖാലിദും; 4 ഇയേഴ്‌സിലെ പുതിയ ഗാനം കാണാം

മലയാളത്തിലെ സൂപ്പർഹിറ്റ് സംവിധായകരിലൊരാളായ രഞ്ജിത് ശങ്കർ സംവിധാനം ചെയ്ത ഏറ്റവും പുതിയ ചിത്രമാണ് 4 ഇയേഴ്സ്. ഈ കഴിഞ്ഞ വെള്ളിയാഴ്ച റിലീസ് ചെയ്ത 4 ഇയേഴ്‌സിന് മികച്ച പ്രേക്ഷക പ്രതികരണവും നിരൂപക പ്രശംസയുമാണ് ലഭിച്ചത്. ക്യാമ്പസ് സൗഹൃദവും പ്രണയവും പ്രമേയമാക്കി രഞ്ജിത് ശങ്കർ തന്നെ രചിച്ച ഈ ചിത്രം ഡ്രീംസ് ആന്റ് ബിയോണ്ടിന്റെ ബാനറില്‍ രഞ്ജിത് ശങ്കറും ജയസൂര്യയും ചേര്‍ന്നാണ് നിർമ്മിച്ചിരിക്കുന്നത്. ഒമർ ലുലു ഒരുക്കിയ ഒരു അഡാർ ലവ് എന്ന ചിത്രത്തിലൂടെ അരങ്ങേറ്റം കുറിച്ച് പ്രശസ്തയായ പ്രിയ പ്രകാശ് വാര്യർ ഒരിടവേളക്ക് ശേഷം മലയാളത്തിലെത്തുന്ന ഈ ചിത്രത്തിലെ നായകനായി എത്തിയിരിക്കുന്നത് ജൂൺ എന്ന ചിത്രത്തിലൂടെ കയ്യടി നേടിയ സർജാനോ ഖാലിദാണ്. സർജാനോ ഖാലിദ് വിശാൽ എന്ന കഥാപാത്രത്തിന് ജീവൻ നൽകിയ ഈ ചിത്രത്തിൽ ഗായത്രി എന്ന കഥാപാത്രമാണ് പ്രിയ ചെയ്തത്.

ക്യാമ്പസിൽ നാല് വർഷം ഒരുമിച്ച് ചിലവഴിക്കുന്ന പ്രണയജോഡികളുടെ കഥ പറയുന്ന ഈ ചിത്രത്തിലെ ഒരു വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. പറന്നേ പോകുന്നെ എന്ന വരികളോടെ തുടങ്ങുന്ന ഈ ഗാനത്തിന്റെ ഹൈലൈറ്റ്, ഇതിൽ ഏറെ ഇഴുകിച്ചേർന്നാണ് സർജാനോ ഖാലിദ്- പ്രിയ വാര്യർ ടീം അഭിനയിച്ചിരിക്കുന്നത് എന്നതാണ്. സന്ധൂപ് നാരായണൻ വരികൾ രചിച്ച ഈ ഗാനത്തിന് സംഗീതം പകർന്നത് ശങ്കർ ശർമയും ഈ ഗാനം ആലപിച്ചിരിക്കുന്നത് നജിം അർഷാദ്, ശ്രുതി ശിവദാസ് എന്നിവർ ചേർന്നുമാണ്. രഞ്ജിത് ശങ്കർ ഒരുക്കിയ പതിനാലാമത്തെ ചിത്രമാണ് 4 ഇയേഴ്സ്. സാലു കെ. തോമസ് ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് സംഗീത് പ്രതാപാണ്.